Ministria e Industrisë, Ndërmarrësisë dhe Tregtisë, përkatësisht Agjencia Për Regjistrimin e Bizneseve në Kosovë (ARBK), ka nënshkruar memorandum bashkëpunimi me Doganën e Kosovës.
Ky memorandum bashkëpunimi u nënshkrua për sigurimin e të dhënave dhe qasjen online nga ana e Doganës në të dhënat e shoqërive tregtare nga regjistri zyrtar i bizneseve në ARBK.
“Nënshkrimi i memorandumit u realizua në ambientet e Ministrisë së Industrisë, Ndërmarrësisë dhe Tregtisë, nga znj. Lebibe Haliti në cilësinë e zv.Drejtores së Përgjithshme të ARBK-së, dhe z.Agron Llugaliu, Drejtor i Përgjithshëm i Doganës së Kosovës”, thuhet në njoftimin e MINT-it.
Më tej thuhet se sigurimi i të dhënave nga ARBK, do të ndihmojë Doganën e Kosovës në veçanti gjatë procesit të hetimit dhe luftimit të aktiviteteve të paligjshme, si dhe do të ndikojë dukshëm në fuqizimin dhe lehtësimin e mëtutjeshëm të koordinimit dhe bashkëpunimit ndër-institucional.
