Ministri i Punëve të Brendshme, Xhelal Sveçla, ka thënë se me shqetësim ka pranuar lajmin për dhunimin e 11-vjeçares nga 5 persona.
Në një postim në llogarinë e tij në Facebook, Sveçla ka thënë se është i vetëdijshëm për shqetësimin e secilit prind dhe secilës vajzë në vendin tonë.
Ministri Sveçla ka thënë se ka kërkuar nga Policia e Kosovës angazhim maksimal për arrestimin sa më të shpejtë të të gjithë kryesve të këtij akti makabër.
“Sapo u njoftova se janë arrestuar edhe 2 të tjerë. Koordinimi i të gjitha organeve kompetente është i domosdoshëm, sepse nuk ka asnjë dilemë që dënimi ndaj këtyre kriminelëve duhet të jetë maksimal”, ka shkruar ndër të tjera ministri.
Postimi i plotë:
Me shqetësim kam pranuar lajmin për dhunimin e një vajze të mitur, 11 vjeçare, nga 5 persona për disa orë me radhë. Jam i vetëdijshëm për shqetësimin e drejtë të secilit prind e secilës vajzë në vendin tonë.
Nga Policia e Kosovës kam kërkuar angazhim maksimal për arrestimin sa më të shpejtë të të gjithë kryesve të këtij akti makabër dhe sapo u njoftova se janë arrestuar edhe 2 të tjerë. Koordinimi i të gjitha organeve kompetente është i domosdoshëm sepse nuk ka asnjë dilemë që dënimi ndaj këtyre kriminelëve duhet të jetë maksimal.
Nuk duhet dhe nuk do të tolerohet asnjë veprim që cënon jetën, integritetin dhe mirëqenien e të gjithë qytetarëve tanë. Vendi ynë duhet dhe do të jetë vend i sigurtë për të gjithë, sidomos për vajzat dhe gratë, dhe nuk ka asnjë alternativë tjetër./KosovaNews
