Ministri i Financave, Hekuran Murati ka reaguar ndaj raportimeve për shpenzimet e karburanteve të automjeteve për vitin 2023.
“Lajmet e rreme nuk kalojnë! Shpenzimi i karburantit për automjete për vitin 2023, për nivelin qendror dhe atë lokal, është 10.47 milionë euro. Kjo është e faktuar edhe në raportin vjetor financiar të miratuar e dorëzuar në Kuvend”, ka shkruar Murati, duke demantuar raportimet në media për 31 milionë euro të shpenzuara për karburant të automjeteve.
Ai ka thënë se shumica e këtij shpenzimi shkon për flotën e automjeteve të policisë dhe të FSK-së.
“Raportimet se shpenzimi për karburante të veturave për vitin 2023 është 31 milionë euro është i pavërtetë, dhe i pasaktë. Shifra prej 31 milionë euro që është përmendur nga Raporti Vjetor i Auditimit mund të jetë përmbledhje që përmban edhe shumat që janë shpenzuar për naftë për ngrohje, ose dru zjarri për ngrohje, por nuk ka të bëjë me shifrën faktike që është shpenzuar për karburant për automjete”, ka shtuar Murati.
