Ministri i Mjedisit, Planifikimit Hapësinor dhe Infrastrukturës, Liburn Aliu e ka pritur në takim të enjten ministren për Çështje Sociale dhe Shëndetësi në Finlandë, Hanna Sarkkinen.
Aliu tha se ministren finlandeze ka zhvilluar një bisedë absolutisht të shkëlqyer, me ç’rast kanë vlerësuar edhe ndërveprimin dypalësh me theks të veçantë mbështetjen e Finlandës ndaj Kosovës, sa i përket qeverisjes demokratike, zhvillimit ekonomik, infrastrukturës, mjedisit dhe shëndetësisë.
“Ministren e njoftova lidhur me prioritetet e projekteve të Qeverisë, përkitazi Ministrisë së Mjedisit, Planifikimit Hapësinor dhe Infrastrukturës, për të transformuar ekonominë e vendit tonë, por edhe për të përshpejtuar procesin e rritjes së kapaciteteve tona për anëtarësim në konventa ndërkombëtare. Shpreha mirënjohjen për mbështetjen e vazhdueshme që Finlanda i jep Kosovës dhe gatishmërinë për thellim të bashkëpunimit të mëtutjeshëm”, ka thënë Aliu.
Mes tjerash Aliu dhe Sarkkinen kanë diskutuar edhe për programin e banimit të përballueshëm.
“Theksova qëllimin tonë për adresimin e një nga nevojave më urgjente të qytetarëve tanë, që është banimi i përballueshëm. Pasja e banesave cilësore me çmime të përballueshme jo vetëm që do të përmirësojë cilësinë e jetës së tyre, por gjithashtu do të ndihmojë në nxitjen e zhvillimit ekonomik dhe rritjes së qëndrueshme në Republikën e Kosovës, rrjedhimisht u pajtuam për të thelluar bashkëpunimin teknik, institucional dhe shkëmbimin e informacioneve në këtë drejtim”, ka thënë ai.
Qeveria e Kosovës me të marrë mandatin është deklaruar disa herë për mundësinë e fillimit të projektit për banim të përballueshëm për katër mijë familjeve me programin për banim social.
Madje vetë kryeministri Albin Kurti në muajin janar të këtij viti thënë se janë dy skema që do t’ua mundësojnë familjeve përfituese të bëhen me banesa. Njëra është për familjet që mund të paguajnë këste nga 120 euro për 120 muaj dhe tjetra për 150 euro për maksimalisht 150 muaj.
Kurti pati thënë se kostoja vjetore e këtij projekti është rreth 22 milionë euro, ndërsa pohoi se shuma gradualisht do t’i kthehet institucionit që parashihet të themelohet dhe ngarkohet me zbatimin e projektit./KosovaNews
