Kryeministri i Kosovës, Albin Kurti, të enjten në mbrëmje ka udhëtuar për në Turqi, i shoqëruar nga zëvendëskryeministri i parë, Besnik Bislimi, dhe zëvendëskryeministrja Emilija Rexhepi.
Në kryeqytetin e Turqisë, në Ankara, ai u prit nga presidenti i Turqisë, Recep Tayyip Erdogan.
Krahas takimit dhe drekës së punës me Presidentin e Turqisë, Erdogan, bashkë me zëvendëspresidentin e Turqisë, Cevdet Yilmaz dhe ministrin e Mbrojtjes, Yaşar Güler, Kryeministri i Kosovës, Albin Kurti, u mirëprit gjithashtu edhe nga Ministri i Punëve të Jashtme të Turqisë, Hakan Fidan.
E ndërmjet dy takimeve, vizituan dhe vendosën kurorë me lule në Mauzoleun e Mustafa Kemal Atatürk, një prej liderëve më të mëdhenj dhe historik të botës që në kohë dhe rrethana shumë të vështira arriti të mbrojë popullin e tij dhe të themelojë Republikën e Turqisë, dhe në të njëjtën kohë të trasojë atë që është e mira për shoqëritë, pra paqen si racionalitet politik.
Kryeministri Kurti përmes një postimi në facebook ka thënë se ka vlerësuar lart kontributin që Turqia jep në ruajtjen e paqes, stabilitetit e sigurisë në rajon, por në Kosovë dhe përmes kontingjentit të trupave në kuadër misionit të KFOR-it.
“Marrëdhëniet tona ndërmjet Kosovës dhe Turqisë sa vijnë e thellohen, ndërkohë që punojmë bashkërisht në fuqizimin e bashkëpunimit ekonomik dhe shkëmbimeve tregtare. Në këtë drejtim, një hap i rëndësishëm do të jetë dhe zhvillimi i forumit të parë ekonomik të bizneseve të Kosovës dhe Turqisë, që do të mbahet të hënën në Stamboll”, pëfundoi Kurti.
