Një situatë e re kontroverse ka nisur të ngrejë pikëpyetje rreth Topit të Artë që Lionel Messi fitoi në vitin 2021. Çmimi prestigjioz, i njohur botërisht si vlerësimi maksimal individual për një futbollist, është duke u hetuar për ndërhyrje të mundshme nga klubi i tij i atëhershëm, Paris Saint-Germain.
Mediat franceze Le Monde dhe Mediapart kanë sjellë në vëmendje akuza të rënda ndaj PSG-së, ku thuhet se klubi ka ushtruar ndikim në procesin e votimit për të garantuar se argjnetinasi do të triumfonte për herë të shtatë si fituesi i Topit të Artë, të administruar nga revista “France Football”.
Hetimi i zbuluar nga Le Monde hedh dyshime mbi përfshirjen e Pascal Ferre, i cili shërbeu si president i “France Football” kur Messi fitoi çmimin e fundit.
Raportohet se Ferre, i cili më pas u bë anëtar i departamentit të komunikimit të PSG-së në vitin 2023, kishte përfituar nga trajtimi preferencial nga klubi, duke përfshirë bileta për ndeshje dhe një udhëtim në fluturim “business class” me Qatar Airways, e sponsorizuar nga Qeveria e Katarit.
Dyshimet janë se këto privilegje kanë mundësuar lobimin nga PSG-ja për të siguruar se Messi do të mundte konkurrentin e tij të atëhershëm, sulmuesin polak Robert Lewandowski, për të fituar çmimin në vitin 2021.
Pavarësisht këtyre akuzave, Pascal Ferre ka mohuar çdo ndërhyrje të mundshme dhe ka thënë se procesi i votimit për Topin e Artë është zhvilluar në mënyrë të ndershme dhe transparente. Çështja mbetet nën hetim dhe pritet të sjellë më shumë sqarime në të ardhmen për këtë çështje që ka tërhequr vëmendjen e të gjithë botës së futbollit.
