Ministri i Mbrojtjes, Armend Mehaj përmes një postimi në Facebook ka thënë se bashkëpunimi i vazhdueshëm mes Ministrive të Mbrojtjes dhe Forcave Ushtarake të Turqisë dhe Kosovës, kurorëzohet edhe me diplomimin e Nënoficeres së FSK-së, Donika Gashi, në Universitetin e Shkencave Mjekësore Gulhane në Ankara.
“Diplomimi i nënoficeres Gashi ne mesin e 687 studentëve, prej tyre 6 ndërkombëtar është në funksion të ngritjes së kapaciteteve profesionale mjekësore ushtarake brenda FSK-së’, ka thënë Mehaj.
Ai ka bërë të ditur se në ceremoninë e diplomimit morën pjesë stafi i lartë i Universitetit të Shkencave Mjekësore Gulhane, përfaqësues të lartë të Ministrisë së Mbrojtjes Nacionale, përfaqësues të Forcave të Armatosura Turke si dhe përfaqësues të shteteve tjera.
“NOF Gashi pranoi diplomën nga Atasheu i Mbrojtjes së Kosovës në Republikën e Turqisë, Kolonel Bekim Zejnullahu. Suksese të mëtutjeshme për Donikën në detyrën e saj për t’i shërbyer atdheut”, ka thënë ministri Mehaj.
