Është mbyllur të premten, më 29.08.2025, Seminari i 43-të ndërkombëtar për Gjuhën, Letërsinë dhe Kulturën Shqiptare.
Për 12 ditë me radhë edicioni i sivjetmë i këtij Seminari mblodhi studiues, profesorë dhe studentë nga vende të ndryshme të botës, të cilët merren apo janë të pasionuar pas gjuhës, letërsisë dhe kulturës shqiptare.
Gjatë Seminarit pati diskutime të rëndësishme shkencore, ligjërata, tryeza, referime e aktivitete të tjera kulturore.Në ceremoninë mbylljes së Seminarit, drejtoresha Lindita Sejdiu falënderoi pjesëmarrësit për kontributin e vyer që ata sollën dhe frymën bashkëpunuese që, siç tha ajo, e karakterizon këtë ngjarje.
“Përmes kumtesave, diskutimeve, tryezave, ligjëratave të ndryshme, ky Seminar ka dëshmuar edhe një herë rëndësinë e bashkëpunimit ndërkombëtar në fushën e albanologjisë dhe të studimeve që e shoqërojnë këtë fushë”- tha ajo, duke shtuar se njohuritë dhe mësimet që seminaristët morën do të mbeten një bazë e çmuar për hulumtime të mëtejme akademike.
Seminari i 43-të ndërkombëtar për Gjuhën, Letërsinë dhe Kulturë Shqiptare ka nisur më 18.08.2025, ndërsa kanë marrë pjesë rreth 200 seminaristë nga vende të ndryshme.Gjatë këtij seminari janë mbajtur kurse të gjuhës shqipe për pjesëmarrësit e huaj, ligjërata, referime, tryeza e sesione shkencore.
Temat boshte të Seminarit këtë edicion u fokusuan në zhvillimet aktuale, qoftë në leksik, në ndikimin apo përdorimin e shqipes në rrjetet sociale dhe postmodernizmin në letërsinë shqipe.“Zhvillime aktuale lidhur me leksikun e shqipes” dhe “Shqipja në rrjetet sociale” ishin temat nga fusha e gjuhësisë.
Ndërsa në sesionin e letërsisë u diskutua mbi “Postmodernizmin në letërsinë shqipe”.HistorikuSeminari ndërkombëtar për Gjuhën, Letërsinë dhe Kulturën Shqiptare është themeluar në vitin 1974 në Fakultetin e Filologjisë (atëherë: Fakulteti Filozofik) të Universitetit të Prishtinës.Seminari ka zhvilluar gjithsej 42 sesione deri tash. Në vitin 1991 është ndërprerë veprimtaria e tij nga organet serbe.Në vitet 1995 e 1996 sesionet e këtij Seminari u mbajtën në Tiranë në bashkëpunim me Institutin e Gjuhësisë e të Letërsisë të Akademisë së Shkencave të Shqipërisë.
Nga viti 2000 Seminari vepron sërish në Prishtinë. Sesionet 19 dhe 20 (2000-2001) janë organizuar në bashkëpunim me Institutin e Gjuhësisë dhe të Letërsisë të Akademisë së Shkencave të Shqipërisë.Më 2020 qe ndërprerë aktiviteti, për shkak të pandemisë Covid-19.
Ky Seminar organizohet për studente/ë e studiues/e që merren me probleme të gjuhës, të letërsisë e të kulturës shqiptare, por edhe me albanologjinë përgjithësisht.
