Presidentja e Kosovës, Vjosa Osmani, ka zhvilluar një takim bilateral me Mbretin Abdullah II të Jordanisë në kuadër të Takimit Aqaba në Sofje, ku kanë diskutuar për forcimin e marrëdhënieve mes dy vendeve, sfidat e sigurisë dhe zhvillimet gjeopolitike, shkruan KosovaNews.
Nëpërmjet një postimi në rrjetet sociale, Osmani ka bërë të ditur se me Mbretin Abdullah II kanë diskutuar për thellimin e bashkëpunimit në fushën e mbrojtjes, ekonomisë dhe diplomacisë.
“Në kuadër të Takimit Aqaba në Sofje, pata kënaqësinë që në një takim bilateral me Mbretin Abdullah II të Jordanisë të diskutojmë për forcimin e marrëdhënieve mes Kosovës dhe Jordanisë, sfidat e sigurisë dhe zhvillimet gjeopolitike,” ka shkruar Osmani.
Ajo ka theksuar se bashkëpunimi mes dy vendeve do të konkretizohet së shpejti me marrëveshje specifike.
“Do të forcojmë bashkëpunimin tonë në mbrojtje, ekonomi dhe diplomaci, me marrëveshje që do të konkretizohen së shpejti,” ka shtuar Osmani.
Takimi mes Osmanit dhe Mbretit Abdullah II vjen në një kohë kur Kosova po synon të zgjerojë bashkëpunimin ndërkombëtar në fusha të ndryshme, duke përfshirë sigurinë dhe ekonominë.
