Vendimi i Qeverisë së Kosovës për të shtyrë zbatimin e vendimit të reciprocitetit për targa dhe letërnjoftime deri me 1 shtator, ka marrë mbështetjen e qytetarëve.
Në sondazhin e Telegrafit kanë votuar 5 mijë e 552 persona, të cilët janë përgjigjur në pyetjen se si e vlerësojnë vendimin e Qeverisë së Kosovës që të shtyjë deri më 1 shtator implementimin e vendimeve të reciprocitetit të letërnjoftimeve me Serbinë dhe atë për targat.
Mbi 70 për qind e qytetarëve që kanë marrë pjesë në këtë sondazh konsiderojnë se vendimi i Qeverisë është i drejtë, 20 për qind e cilësojnë të gabuar, ndërsa 6 për qind kanë thënë se nuk kanë mendim mbi këtë çështje.
Qeveria e Kosovës ka shtyrë zbatimin e vendimit të reciprocitetit për targa dhe letërnjoftime deri me 1 shtator, pas kërkesës së Shteteve të Bashkuara të Amerikës.
Qeveria njoftoi të dielën se vendimi erdhi pas takimit me ambasadorin amerikan, Jeff Hovenier, si dhe faktorët të tjerë ndërkombëtarë.
“Kurti së bashku me Osmanin dhe zv/kryeminsitrin Bislimi e Gërvalla, kanë zhvilluar kontakte e takime me faktorët ndërkombëtarë amerikanë dhe evropianë. Me këtë rast, Qeveria e Kosovës jep zotimin që të shtyhet zbatimi i dy vendimeve të datës 29 qershor 2022, deri me datën 1 shtator 2022, nga momenti në ditën e hënë, 1 gusht 2022, kur do të hiqen të gjitha barrikadat dhe të vendoset liria e plotë e lëvizjes në të gjitha rrugët në veri të Kosovës”, u tha në njoftimin e ekzekutivit.
Këtë vendim të Qeverisë e ka përshëndetur ambasadori Hovenier, i cili përmes një postimi në Twitter ka thënë se këto dy masa janë në përputhje me marrëveshjet e nënshkruara në Bruksel dhe se të njëjtat ishin të koordinuara me ndërkombëtarët.
“SHBA-ja mirëpret vendimin e liderëve të Kosovës për të pezulluar përkohësisht zbatimin e masave të reciprocitetit për targat dhe dokumentet hyrëse/dalëse, të dyja masat janë plotësisht në përputhje me marrëveshjet e Brukselit dhe ishin të koordinuara me komunitetin ndërkombëtar”, ka shkruar Hovenier.
Vendimi i 29 qershorit i ekzekutivit kosovar parasheh lëshimin e dokumentit për hyrje-dalje për të gjithë personat që posedojnë dokumente serbe.
Praktikë të njëjtë Serbia ka aplikuar ndaj qytetarëve të Kosovës për vite me radhë.
Ndërkaq, vendimi i dytë parasheh që të gjithë pronarët e makinave me targa me akronime të qyteteve të Kosovës – që lëshohen nga Serbia – të mund të ri-regjistrojnë makinat e tyre në targat RKS (Republika e Kosovës).
