Kosova është mikpritëse dhe organizatore e Kampionatit Evropian të Esports 2025, ku do të garojnë 36 ekipe. Kryeministri në detyrë i Republikës së Kosovës, Albin Kurti, mori pjesë në ceremoninë hapëse të ngjarjes, i cili mbahet në sallën ‘’1 Tetori’’ në Prishtinë, nga sot deri me 13 korrik.
Në fjalën e tij, kryeministri Kurti shprehu krenarinë që Kosova është mikpritëse e një ngjarjeje të tillë. ”Sigurisht, si në çdo ngjarje tjetër sportive, fitorja ka rëndësi. Secili atlet ka ndjekur përsosmërinë me pasion dhe përkushtim. Por fuqia e vërtetë e këtij kampionati jeton përtej tabelës së rezultateve, por në lidhjet që ndërtojmë, historitë që ndajmë dhe komunitetin që krijojmë së bashku”, u shpreh ai.
Më tej, kryeministri theksoi se Kosova është një vend ku talenti rritet me shpejtësi dhe se të rinjtë tanë mishërojnë fuqinë e vizionit dhe përkushtimit. Shtoi se aftësitë dhe pasioni i tyre si në sport ashtu edhe në teknologji krijojnë një themel të fortë, duke i bërë Esportet një shprehje natyrale të shpirtit dhe potencialit të vendit tonë.
“Kampionati Evropian, Kosova 2025, qëndron si një moment i rëndësishëm — jo vetëm në Esports, por në atë që përfaqëson për rajonin tonë dhe më gjerë. Këtu, në këtë skenë, ne dëshmojmë se si lojtarë nga vende dhe prejardhje të ndryshme bashkohen nga një qëllim i përbashkët, të nxitur nga respekti dhe puna në grup. Kjo është pikërisht ajo që i duhet botës sot: unitet që ngrihet mbi kaosin, përpjekje të përbashkëta që ngrihen mbi kufijtë individualë dhe ide që ndërtojnë ura në vend të mureve.” tha kryeministri.
Ndeshja e parë hapëse e këtij kampionati do të jetë ajo mes Republikës së Kosovës dhe Republikës së Çekisë. Kampionati po organizohet nga Federata Esports Kosova me mbështetjen e Ministrisë së Kulturës, Rinisë dhe Sportit.
