Prokuroria Themelore në Pejë, Departamenti i Krimeve të Rënda, ka ngritur aktakuzë kundër pesë personave, të cilët dyshohen për keqpërdorim të pozitës zyrtare në procesin e nxjerrjes së patentave të vozitjes.
Sipas aktakuzës, i pandehuri A.R., në cilësinë e ekzaminerit, dyshohet se ka ndihmuar disa kandidatë duke u treguar pyetjet e sakta gjatë testimit teorik për patentë shofer, që nga 18 korriku deri më 22 shtator 2022 në Pejë. Kjo i ka mundësuar kandidatëve të kalojnë provimin teorik në mënyrë të paligjshme.
Gjithashtu, i pandehuri L.G., asistent administrativ në njësinë për patentë shofer, dyshohet se ka lejuar kandidatët të paraqiten në provim pa bërë pagesën e duhur, duke shfrytëzuar fletëpagesën e provimit të kaluar.
Ndërkohë, tre të pandehurit e tjerë, D.T., A.A. dhe F.T., instruktorë profesionalë të auto-skolës në Deçan, dyshohen se kanë falsifikuar orët e trajnimit për kandidatët që nuk kanë qenë në Kosovë, duke i ndihmuar të marrin provimin për patentë shofer në mënyrë të jashtëligjshme.
Prokurori ka kërkuar jo vetëm dënimin e tyre, por edhe ndalimin e ushtrimit të funksioneve publike dhe profesionit.
Prokuroria Themelore në Pejë thekson angazhimin e saj të vazhdueshëm në luftën kundër korrupsionit dhe ndjekjen e personave përgjegjës sipas ligjit.
