Ministria e Arsimit, Shkencës, Teknologjisë dhe Inovacionit (MASHTI), njoftoi dje se orët e humbura gjatë grevës në arsim, do të zëvendësohen dhe për këtë ministrja Arbërie Nagavci tha se i ka Ministrisë së Financave, që të shqyrtojë mundësinë e pagesës në avans për mësimdhënësit që do të respektojnë këtë vendim.
Por kryetari i SBAShK-ut, Rrahman Jasharaj ka dhënë një deklaratë që mund të rrezikojë e t’i lë mësimdhënësit pa paga.
Jasharaj ka thënë ka thënë të martën se mësimdhënësit në vend nuk do ta respektojnë vendimin e Ministrisë së Arsimit për zëvendësim të orëve të humbura si pasojë e grevës.
Në Interaktiv të KTV-së, Jasharaj ka thënë se vendimi ka qenë i njëanshëm.
“Për pagën për shtator qëndrimi i SBAShK-ut është i qartë, pasi që janë paguar shërbyesit civilë që ishin bashkë në grevën, ne presim që nesër ta realizojë pagën për shtator edhe për sektorin e arsimit. S’mund të ketë ligj që për dikë lejuaka, e për dikë jo. Pasi që të bëhet kjo, sepse pezullimi u bë për hir të nxënësve e prindërve, me rezultat të ngushtë, ministrja Nagavci duhet të dërgojë mesazhe pozitive e duhet të ndihet keq si ministre kur ka parë se sektori i shërbyesve civilë që ishin bashkë në grevë dhe kanë marrë pagën e sistemi arsimor jo. Kjo ishte thikë pas shpine për SBASHK-un pasi bëri çmos që të rikthehet mësimi në shkolla. Ministrja Nagavci duhet të angazhohet që nesër (5 tetor) të bëhet procedimi i pagave. Sa i takon orëve s’mund të sjellë vendim të njëanshëm sepse kontrata kolektive e MASHTI-t me SBAShK-un e thotë qartë se orët nuk zëvendësohen pa marrëveshje dypalëshe. Thotë qartë se nuk zëvendësohen ora e grevave, por e humbura për arsye tjera, si ajo të COVID-it”, ka thënë Jasharaj.
Ndwrkohw ministrja e Arsimit, Arbërie Nagavci, tha se i ka propozuar Ministrisë së Financave, që të shqyrtojë mundësinë e pagesës në avans për mësimdhënësit që do të respektojnë këtë vendim.
“Duke qenë të bindur se punëtorët e arsimit do të respektojnë vendimin e ri për kalendarin e Vitit Shkollor dhe do të kryejnë punën, dhe duke marrë parasysh faktin se shumë prej tyre janë vënë në lajthitje ose kanë pasur paqartësi rreth dispozitave ligjore, i kemi propozuar Ministrisë së Financave, Punës dhe Transfereve që të shqyrtojnë mundësinë e pagesës në avans, ashtu që familjet e mësimdhënësve, të mos mbesin pa paga deri në fund të muajit, kur edhe dalin pagat për muajin tetor”, tha Nagavci.
Sipas vendimit, tetë orë mësimore të pambajtura për nxënësit nga klasa e parë deri në të tetën do të zëvendësohen gjatë të shtunave. Ndërkaq, gjysmëvjetori i parë për nivelin parauniversitar do të përfundojë më 27 janar dhe pushimi dimëror do të nisë më 30 janar dhe do të zgjasë deri më 3 shkurt të vitit 2023, raporton KosovaNews.
Gjysmëvjetori i dytë për vitin shkollor 2022-2023 do të nisë më 6 shkurt dhe pesë ditët e mbetura mësimore do të mbahen gjatë pushtimit pranveror “në të gjitha nivelet e arsimit parauniversitar”.
Viti shkollor do të përfundojë në data të ndryshme për nivelin e arsimit parauniversitar. Maturantët do ta përfundojnë vitin shkollor më 5 qershor, klasët e nënta, dhjeta dhe njëmbëdhjeta më 27 qershor dhe parafillorët më 30 qershor të vitit 2023./KosovaNews/