Qindra qytetarë marshuan në qytetin e Pejës, me thirrjet që të ndërpritet greva në arsim.
“Qeveri-SBASHK, duam zgjidhje, duam të fillojmë procesin mësimor” dhe “Nxënësit në shkollë” ishin ndër thirrjet që të rinjtë patën në këtë marsh.
“Me këtë marsh paqësor me moto Qeveri – SBASHK duam nxënësit në shkollë, u bëjmë thirrje dyla palëve të gjejnë zgjidhje sa më të shpejtë, që ne të fillojmë procesin mësimor. Fëmijët e kanë vendin në shkollë e jo në shtëpi. Të mos rrezikojnë të nxjerrin ata në rrugë për qëllime të dy palëve. Mësimdhënësit i mirëpresin nxënësit në shkollë, bëjë apel që sa më parë të marrin vendim e të nxjerrin fëmijët nga kjo fushëbetejë që është mes dy palëve”, ka thënë Arta Kollqaku Gashi kryetare e Këshillit të Prindërve të Pejës.
Ndërkohë Hazir Tigani, kryetar i Këshillit të Prindërve të rrafshit të Dukagjinit, dhe përfaqësues i kryesisë në nivel qendror, ka bërë thirrje që të nisë mësimi qysh nesër e të arrihet marrëveshje mes palëve. Por, ai ka pasur edhe një apel – të mos fyhen mësimdhënësit.
“Nuk është mirë, nuk është në nderin tonë, si komb e qytetarë, të fyejmë nderin e mësimdhënësit. Sot të nderuar prindër keni pasur rastin të vini e bashkëngjiteni për të treguar kërkesat e juaja e nuk duhet bërë kjo me fyerje në portale të ndryshme. Mësimdhënësit janë truri i kombit tonë, të mos e lëndojmë se nuk mund të lëvizim më pas. Të mos i fyejmë e të ruajmë raportet, pasi janë mësimdhënësit e fëmijëve tanë”, ka thënë Tigani.
Sindikata e Arsimit, Shkencës dhe Kulturës, ka deklaruar se greva që nisi më 25 gusht, nuk do të ndërpritet derisa mësimdhënësve t’iu plotësohen kërkesat.
Javën e kaluar, Këshilli Grevist i Bashkimit të Sindikatave të Pavarura u takua me Qeverinë por nuk arritën të merreshin vesh për ndërprerje të grevës.
