Manxhuka i LVV-së kritikon Odën Ekonomike: Po lobon për 1%-shin në kurriz të qytetarëve

Zëdhënësi i Lëvizjes Vetëvendosje, Arlind Manxhuka, ka reaguar ashpër ndaj Odës Ekonomike të Kosovës, duke e akuzuar se po përhap panik dhe po lobon në interes të një përqindëshi të vogël të bizneseve të mëdha, në dëm të qytetarëve dhe ndërmarrjeve të vogla.

Përmes një postimi në rrjetet sociale, Manxhuka ka shpërndarë deklaratën e Ministres në detyrë të Ekonomisë, Artane Rizvanolli, e cila tha se Qeveria do të vazhdojë të qëndrojë përkrah prodhuesve vendorë në procesin e liberalizimit të tregut të energjisë, duke e cilësuar si obligim ligjor të vonuar, por të domosdoshëm.

“Oda Ekonomike ka gojën plot me fjalën ‘tranzicion’, ndërkohë vet do të hidhet direkt në bllokim rrugësh si hap i parë sipas tyre”, ka shkruar Manxhuka, duke kritikuar qasjen e kësaj organizate ndaj reformës energjetike dhe përpjekjet për të ndikuar në politikat publike përmes presionit dhe panikut.

Sipas tij, qëllimi i Odës është të zhvendosë koston e energjisë nga kompanitë më të mëdha tek familjet dhe ndërmarrjet e vogla, duke i bërë qytetarët pa dashje “lobues të 1%-shit”. Ai shtoi se nuk do të lejohet që institucionet të shantazhohen për interesa të ngushta në dëm të interesit publik.

Reagimi i Manxhukës dhe Rizvanollit vjen në vazhdën e debatit mbi daljen në tregun e hapur të energjisë dhe pas paralajmërimeve për bllokim të rrugëve nga ana e Odës Ekonomike si formë proteste ndaj reformës.