Emmanuel Macron ka deklaruar se një marrëveshje paqeje me Rusinë “nuk duhet të nënkuptojë një dorëzim të Ukrainës”.
Presidentët e SHBA-së dhe Francës u takuan mes marrëdhënieve të brishta midis Amerikës dhe Evropës dhe pasi Trump nisi një sulm verbal ndaj presidentit ukrainas Volodymyr Zelensky.
Duke u takuar në Shtëpinë e Bardhë në përvjetorin e tretë të luftës së Rusisë në Ukrainë, presidenti francez tha se ai dhe Trump “bërën hapa thelbësorë gjatë diskutimeve”.
Macron tha se Evropa duhet të bëjë më shumë për të forcuar mbrojtjen në kontinent, shkruan skynews.
Megjithatë, ai theksoi se Rusia “është agresore” në konflikt dhe shtoi: “Presidenti Putin shkeli paqen”.
Paqja duhet të lejojë “sovranitetin” e Kievit
Udhëheqësi francez më pas tha: “Ne duam paqe, ai dëshiron paqe. Ne duam paqe të shpejtë, por nuk duam një marrëveshje që është e dobët.”
“Kjo paqe nuk duhet të nënkuptojë një dorëzim të Ukrainës ose një armëpushim pa garanci”, shtoi ai.
“Ajo duhet të lejojë sovranitetin ukrainas dhe të lejojë Ukrainën të negociojë me palët e tjera të interesuara në lidhje me çështjet që e prekin atë”, vazhdoi presidenti francez.
“Është gjithashtu një vend për të cilin ne duhet të mbajmë përgjegjësitë tona për të garantuar siguri dhe stabilitet për të dhe gjithë rajonin”.
‘Të ndalet kjo luftë’
Raportohet se në një konferencë shtypi pas bisedimeve, Macron tha se ai “beson plotësisht” se ka një rrugë përpara në negociata.
Ai gjithashtu ra dakord se “ka arsye të mirë që Trump të ri-angazhohet me Putinin” – një javë pasi udhëheqësit patën një telefonatë 90-minutëshe.
Trump shtoi se Rusia do të pranonte trupat evropiane në Ukrainë si pjesë e përpjekjeve paqeruajtëse, duke shtuar: “Unë i bëra atij këtë pyetje në mënyrë specifike. Ai nuk ka asnjë problem me të.”
Trump më pas shpjegoi se dëshiron të “ndalojë këtë luftë”, qoftë kjo përmes një armëpushimi apo një marrëveshjeje të drejtpërdrejtë – por kur u pyet nëse Ukraina duhet të heqë dorë nga territori si pjesë e ndonjë marrëveshjeje, ai tha: “Do të shohim”.
Në një intervistë pas konferencës për shtyp, Macron tha se mendonte se një marrëveshje paqeje mund të arrihet brenda javësh.
“Ne duam paqen e shpejtë, por nuk duam një marrëveshje që është e dobët”, tha ai.
Ndryshe, presidenti amerikan do të takohet me kryeministrin britanik, Keir Starmer, pasi ai paralajmëroi se një marrëveshje e keqe paqeje do të ishte një “katastrofë për të gjithë”
