Lëvizja Vetëvendosje! – Qendra Prishtinë, ka dënuar fuqishëm përdorimin e hapësirave të institucioneve shëndetësore për aktivitete politike dhe presionin e turpshëm ndaj punëtorëve shëndetësorë të Qendrës Kryesore të Mjekësisë Familjare (KPSH) për të marrë pjesë në tubime partiake, siç ndodhi me ngjarjen e djeshme të LDK-së në këtë objekt.
Përmes një njoftimi, LVV ka theksuar se keqpërdorimi i punëtorëve shëndetësor gjatë orarit të punës për fushatë partiake është një dëshmi e qartë e trajtimit të shëndetësisë publike nga ky subjekt politik, që vet e ka shkatërruar këtë sektor për vite me radhë.
“Ky akt skandaloz përfaqëson një dhunim të papranueshëm të institucioneve publike dhe një sulm direkt ndaj integritetit, etikës profesionale dhe betimit të Hipokratit”.
Lëvizja Vetëvendosje kërkon një ndëshkim të menjëhershëm dhe të plotë për ata që lejojnë dhe nxisin një sjellje të tillë të turpshme.
“ Askush nuk ka të drejtë të përdhosë institucionet publike për përfitime të ulëta politike. Ftojmë institucionet kompetente të marrin masat e nevojshme ligjore dhe të sanksionojnë organizatorët e tubimit. Kjo është mënyra e vetme për t’i dhënë fund kësaj praktike abuzuese dhe të papranueshme të shfrytëzimit të pushtetit për dhe në funksion të interesave partiake”.
