Kandidati i Lëvizjes Vetëvendosje për deputet, Luan Aliu, ka vlerësuar tubimin e mbajtur në Gjilan, duke e cilësuar atë si një dëshmi të qartë të mbështetjes qytetare për vazhdimin e politikave të zhvillimit dhe përparimit.
Përmes një postimi në rrjetet sociale, Aliu tha se mijëra qytetarë morën pjesë në tubim, duke krijuar një atmosferë të mbushur me energji, entuziazëm dhe besim.
Sipas tij, pritja e organizuar për Kryeministrin Albin Kurti u shoqërua me brohoritje të vazhdueshme, ndërsa pjesëmarrja e madhe e qytetarëve tregoi vullnetin për të vazhduar përpara me vizion, punë dhe përkushtim.
Aliu theksoi se në tubim morën pjesë qytetarë të të gjitha moshave, nga të rinjtë deri te familjet e shumta, duke e bërë mbrëmjen një ngjarje të veçantë për qytetin e Gjilanit.
“Gjilani foli qartë. Faleminderit për mbështetjen, energjinë dhe besimin tuaj të palëkundur”, ka shkruar Aliu, duke shtuar se ky mobilizim dëshmon forcën dhe vendosmërinë e qytetarëve në prag të zgjedhjeve.
Në fund të reagimit të tij, kandidati i LVV-së ka falënderuar qytetarët e Gjilanit për mbështetjen masive, duke e përmbyllur mesazhin me fjalët: “Faleminderit Gjilan, ja qitët pikën!”.
