Policia e Kosovës ka bërë të ditur se janë liruar dy persona të nacionalitetit serb që u arrestuan sot për pengimin dhe provokimin e punonjësve të cilët po pastronin grafite me mbishkrime nacionaliste pranë urës së Ibrit në Mitrovicën e Veriut.
Alleksandar Arsenijeviq dhe Stean Vellkoviq nga partia Demokracia Serbe ishin të arrestuar.
Nga kjo parti serbe më pas thanë se është arrestuar edhe politikani, Stefan Vellkoviq.
Grafitet, të cilat përmbanin mesazhe nxitëse dhe urrejtëse të lidhura me organizatën “Severna Brigada”, ishin vendosur në shesh afër urës.
“Sot, me datën 08.08.2024 rreth orës 11:00, disa persona të nacionalitetit serb ishin tubuar në një lokacion afër urës në Mitrovicë Veri dhe të njëjtit kanë filluar të pengojnë punëtorët të cilët ishin të kontraktuar dhe të angazhuar nga autoriteti kompetent, për të pastruar disa grafite me mbishkrime nacionaliste, që krijojnë nxitje dhe urrejtje si “severna brigada” etj. të cilat ishin në shesh afër urës.
Personat në fjalë janë paralajmëruar disa herë që të mos pengojnë punën dhe të largohen, mirëpo të njëjtit kanë vazhduar duke penguar dhe duke mos lejuar realizimin e punimeve, si dhe kanë provokuar dhe kanë nxitur tensione.
Njësitet policore relevante, me qëllim të qetësimit të situatës dhe krijimit të mundësive për punë, janë detyruar të veprojnë dhe kanë shoqëruar në stacion policor për intervistim dy persona.
Personat e shoqëruar në stacion policor, pas intervistimit janë liruar”, thuhet në njoftim.
