Ministri i Financave, Hekuran Murati ka raportuar në Komisionin Parlamentar për Buxhet, Punë dhe Transfere në lidhje me Projektligjin për ndryshimin dhe plotësimin e ligjit për tatimin në pronë.
Raportimi i tij u përcoll me kritika nga deputetë të partive opozitare të cilët thanë se komunave do t’u bien të hyrat për shkak të vendimit të ministrisë për faljen deri në 100 euro nga fatura e tatimit.
Ndërsa, ministri Murati tha se përmes këtij projektligji do të lehtësohet barra e qytetarëve.
“Ideja ka qenë për zbritjen e 100 eurove të para që të lehtësohet barra e qytetarëve. Për vitin 2024 janë paraparë disa ndryshime pasi shuma e zbritur nga vlera e tatimit në ligjin aktual është 15 mijë euro, derisa në ndryshimin e ligjit të ri do të jetë 30 mijë euro. Për vitin 2025 këto zbritje vlejnë dhe shkalla tatimore kthehet në progresive bazuar në vlerën e pronës që ka një pronar”, ka deklaruar ai.
Ministrit Murati i është kundërpërgjigjur deputeti i LDK-së, Avdullah Hoti i cili kërkoi sqarime se si do t’ia kompensojë komunave rëniet e të hyrave.
“Ky është një ligj shumë i rëndësishëm për të kaluar në diskutim publik. Në janar të vitit 2023 qytetarët i kanë marrë dyfish më të larta faturat. Nuk janë bërë përgatitjet e nevojshme për t’i bërë këto vlerësime të pronave. Andaj kemi pasur disa anomali që disa lagje në Prishtinë janë tatimuar më pak se disa në Fushë-Kosovë. Një reformë kaq e madhe të kalojë në këtë mënyrë është e dëmshme. Për shembull nga rreth 92 mijë fatura në komunën e Prishtinës, 47 mijë janë me vlerë deri në 100 euro dhe 44 mijë janë me vlerë mbi 100 euro. Me vendimin që e keni marrë ju 6.8 milionë euro falen. Si do të kompensohen këto para? Për shkak të kësaj falje do të bien të hyrat e komunave”, ka deklaruar ai.
Mirëpo ministri Murati tha se të hyrat e komunave do të vazhdojnë të jenë të larta edhe pas faljeve tatimore.
Ndaj tij replikoi deputeti Hoti i cili tha se ministri nuk e ka idenë se çfarë po bënë.
Ndërkaq, gjatë raportimit deputetë të pozitës kërkuan sqarime nëse për vendimin Ministria e Financave ka konsultuar edhe komunat.
