Disa qytetarë kanë njoftuar se një alarm është lëshuar në Mitrovicë të Veriut.
Ende nuk dihet se cila është arsyeja e lëshimit të këtij alarmi.
Raportohet se alarme të tilla janë lëshuar edhe në Leposaviq, Zveçan e Zubin-Potok dhe se qytetarë serbë janë mbledhur para ndërtesave komunale në Zubin-Potok, Leposaviq e Zveçan, për të kundërshtuar hyrjen e kryetarëve të rijnë në ndërtesa.
Kryetari i Kuvendit Komunal në Mitrovicë të Veriut, Nexhat Ugljanin, ka thënë se sirenat e alarmit “janë lëshuar nga strukturat paralele”, ndërsa si shkak për to ka thënë se “mund të jetë mitingu që do ta mbajë Aleksandër Vuçiqi në Serbi”.
Ugljanin tutje tha se në komunat tjera, Zubin Potok, Zveçan e Leposaviq, janë tubuar njerëz. Ndërkohë, në Leposaviq janë vendosur kamionë para Komunës.
Policia e Kosovës ka njoftuar se sipas autorizimeve ligjore dhe kushtetuese po ndërmerr veprimet e saja policore në ofrimin e sigurisë, ruajtjen e rendit dhe sigurisë publike si dhe ndërmarrjen e masave policore me qëllim të parandalimit të të gjitha veprimtarive kriminale që paraqiten në vend.
Sipas detyrës zyrtare, sot Policia e Kosovës është duke asistuar kryetarët e komunave veriore Zveçan, Leposaviq dhe Zubin Potok, për të ushtruar të drejtën e tyre në punë, në objektet zyrtare të komunave përkatëse.
