Në rrugën “Xhorxh Bush” në Prishtinë të enjten janë kryer edhe punimet e fundit në infrastrukturë, ndërsa sot gjatë ditës kjo rrugë pritet të hapet, në mënyrë që kjo të kthehet në një shesh për qytetarët si dhe një pjesë e saj në rrugë për autobusë urban si dhe për automjete të tjera emergjente.
Një ditë më parë drejtori i Shërbimeve publike, Ilirik Musliu ka thënë se rruga “Xhorxh Bush” do të jetë njëra nga sheshet e kryeqytetit dhe se hapja e saj do të bëhet të premten.
Kurse Trafiku Urban ka bërë të ditur se nga dita e premte do të rikthehet qarkullimi i autobusëve në linjat 1,3 dhe 4 sipas rendit të udhëtimit të mëparshëm në drejtim të rrugës “Xhorxh Bush”.
Autobusët përgjatë sheshit “Xhorxh Bush” do të lëvizin me shpejtësi të kufizuar në 20 km/h.
Ndërsa linjat 1A dhe 7C do të vazhdojnë sipas rendit të udhëtimit të tanishëm, thuhet në njoftim.
