Një person është arrestuar pasi dyshohet se ka sulmuar një zyrtar policor dhe më pas është arratisur nga vendi i ngjarjes në fshatin Studenicë të Istogut.
IndeksOnline mëson se i arrestuari është Bajram Sadikaj. Ky i fundit rezulton të jetë recidivist i disa veprave penale.
Sipas Policisë, rasti ka ndodhur më 20 shkurt 2026, rreth orës 20:30, në Studenicë të Istogut, kur një njësit policor ka ndaluar për kontroll një të dyshuar që po drejtonte një veturë me targa vendore.
Gjatë kontrollit, tek i dyshuari janë gjetur dy fishekë.
Pas zbulimit të tyre, ai dyshohet se ka goditur zyrtarin policor për t’iu shmangur kontrollit të mëtutjeshëm dhe më pas është arratisur në drejtim të malit, duke lënë në vendngjarje veturën dhe dokumentet personale.
Më vonë, i dyshuari është paraqitur vetë në stacionin policor. Me vendim të prokurorit, ai është dërguar në mbajtje për procedura të mëtejshme. /IndeksOnline/
