Sot po mbahen zgjedhjet e brendshme në Lëvizjen Vetëvendosje.
Qendrat e vendvotimeve janë hapur në orën 10:00 dhe do të mbyllen në orën 19:00.
Në 43 Qendra të Lëvizjes Vetëvendosje mbahet procesi zgjedhor për Kryetar të LVV-së, Kryetare të GVV-së dhe Kryetar të RVV-së, ndërkaq në 26 Qendra mbahen zgjedhje edhe për të njëjtat organe në nivelin e dytë, atë të Qendrave.
Kryetari i Lëvizjes Vetëvendosje, që aktualisht është kryeministër i vendit, Albin Kurti në një deklaratë me shkrim, u ka bërë thirrje gjithë aktivistëve që të dalin dhe të votojnë.
“Viti 2022 është vit i zgjedhjeve. Le të bëhemi më të mirë se vetja. Gratë votojnë për gratë, të rinjtë votojnë për rininë, të gjithë votojmë për VETËVENDOSJE!-n. Përcaktohemi për udhëheqje progresiste për katër vjetët e ardhshme: përveçse për kryetar të LVV, kësaj radhe edhe për kryetare të GVV e kryetar të RVV. Gjithandej Kosovës dhe në mërgatë, në gjithsej 43 qendra, sot mbahen zgjedhje të brendshme demokratike në Lëvizjen tonë të gjerë. I ftoj të gjitha anëtaret dhe anëtarët të votojnë. Urime!”, ka thënë sot kreu i Vetëvendosjes e kryeministri, Albin Kurti.
