Kryeministri i Kosovës, Albin Kurti, është duke mbajtur adresimin e tij në Seminarin e 102-të Rose-Roth të Asamblesë Parlamentare të NATO-s, i cili kësaj radhe po mbahet në Prishtinë.
Duke iu referuar zhvillimeve të fundit globale dhe sidomos agresionit rus në Ukrainë, Kurti tha se shoqëria njerëzore sot është duke u sfiduar nga idetë e vjetra por jo të harruara të fashizmit.
“Në këtë mjedis bashkëkohor të sigurisë vlera njerëzore dhe shoqëria njerëzore është duke u sfiduar nga rilindja e ideve të vjetra por jo të harruara të fashizmit, politika hexhoministe dhe ekspacioniste e Rusisë, tendencat ruse për hexhemoni globale”, ka thënë Kruti.
Ai po ashtu tha se edhe kërcënimet ushtarake të Koresë së Veriut për lindjen e largët, janë indikatorët më të mirë për të treguar se sa serioze dhe delikate është situata e sigurisë.
Kurti ka shtuar se NATO-ja, si organizatë që është përgjegjëse për të promovuar vlerat demokratike, për të ndërtuar besimin, vazhdon të mbetet një aleancë e vendeve që synojnë që të mirëmbajnë paqen dhe stabilitetin në nivel global.
“NATO është e vetmja aleancë politike dhe ushtarake që synon të ruajë të arriturat e shoqërisë njerëzore dhe vlerat demokratike”, ka shtuar ai.
Sot do të vazhdojnë punimet e seminarit të 102 me radhë të Rose-Roth i Asamblesë Parlamentare të NATO-s. Seminari nisi punimet dje më 8 tetor dhe do të vazhdojë deri më 10 tetor 2022.
Kësaj radhe temë do të jetë “Integrimi euro-atlantik i Ballkanit Perëndimor: sfidat e zgjatura, realitetet e reja dhe perspektivat e ardhshme“, në të cilin pritet të jenë më shumë se 100 pjesëmarrës, duke përfshirë deputetë nga vende anëtare të NATO-s dhe vendet partnere.
Gjatë takimit 3-ditor po diskutohet për sfidat dhe perspektivën e ardhshme për Ballkanin Perëndimor në një mjedis të ndryshueshëm të sigurisë evropiane, mbështetjen e NATO-s për paqen dhe stabilitetin në rajon, për qeverisjen dhe reformën e sektorit të sigurisë në Kosovë dhe mbikëqyrjen parlamentare mbi institucionet e sigurisë në Kosovë.
