Policia në Ferizaj ka njoftuar se ka gjobitur me 300 euro dhe i ka shqiptuar ndalim për tre muaj drejtimit të automjetit një shoferi për tejkalim të shpejtësisë.
“Njësia e Trafikut Rrugor, gjatë realizimit të kontrollit me radar në rrugën magjistrale Ferizaj–Gjilan, në fshatin Dardani të Ferizajt, rreth orës 01:25, ka evidentuar një automjet të markës BMW me targa të huaja që po lëvizte me shpejtësi prej 143 km/h në zonën ku kufizimi i lejuar është 50 km/h. Ndaj shoferit A.R., 33 vjeç, është shqiptuar një gjobë për kundërvajtje trafiku për tejkalim të shpejtësisë së lejuar: 300 euro dhe masë mbrojtëse (ndalim i drejtimit të mjetit për 3 muaj)”, thuhet në njoftimin e Policisë.
Policia Rajonale e Ferizajt ka paralajmëruar se do të vazhdojë me kontrolle dhe aktivitete të intensifikuara në funksion të parandalimit të aksidenteve dhe rritjes së sigurisë në komunikacion.
“Apelojmë tek të gjithë shoferët që të respektojnë rregullat dhe shenjat e komunikacionit rrugor. Ftojmë qytetarët që të bashkëpunojnë me Policinë Rajonale të Ferizajt. Për çdo shkelje apo rrezik në komunikacion, mund të njoftoni përmes numrave 192, 0290/326-250, 0290/322-406 apo përmes aplikacionit ‘Lajmëro Policinë’. Të dhënat e raportuesve do të trajtohen me konfidencialitet të plotë”, përfundon njoftimi.
