Kryeministri i Kosovës, Albin Kurti, në përvjetorin e 24-të të masakrës së Reçakut, ku mbetën të vrarë 45 civilë të pafajshëm nga forcat serbe, ka thënë se autori i kësaj masakre, Serbia, vazhdon të shfaqë narrativa mohuese ndaj asaj që ka ndodhur, duke tentuar ta falsifikojë rolin e saj në kryerjen e kësaj masakre.
Në akademinë përkujtimore të mbajtur në nder të kësaj dite, Kurti duke iu referuar presidentit të Serbisë, Aleksandar Vuçiq dhe figurave tjera kyçe në këtë shtet, tha se ata që e mohojnë gjenocidin, ëndërrojnë përsëritjen e tij.
Sipas tij, krimi kundër njerëzimit i kryer në fshatin Reçak të Shtimes më 15 janar të vitit 1999, nuk mund të fshihet, të mjegullohet e as të amnistohet.
“Përgjithësisht kur e vërteta është kaq e fuqishme siç është ajo e masakrës së Reçakut, shfaqen edhe narrativa mohuese ndaj saj sikur që ka bërë Serbia që nga dita e masakrës së Reçakut deri më sot, duke u munduar ta turbullojë dhe falsifikojë rolin e drejtpërdrejt planifikues dhe ekzekutues të shtetit të Serbisë në realizimin e masakrës së Reçakut. Më datë 5 dhjetor të vitit 2019 presidenti aktual i Serbisë që atëbotë ishte ministër i informatave, vetëm para më shumë se para 3 vjetëve, ky president i Serbisë ka deklaruar se masakra e Reçakut ishte fabrikim dhe falsifikim. Ndërsa dy vjet më vonë, ai që dikur ishte zv.president i gruas së Millosheviqit e më pas edhe ministër i punëve të brendshme, ndërsa sot shef i inteligjencës së shtetit serb, saktësisht më datë 10 dhjetor 2021, në ditën e të drejtave universale ndërkombëtare të të drejtave të njeriut, e përsërit atë që e thotë presidenti i Serbisë. Ata që e mohojnë gjenocidin, ëndërrojnë për përsëritjen e tij”, ka thënë Kurti.
