Kryeministri Albin Kurti i është përgjigjur letrës së përfaqësuesit të Lartë të BE-së, Josep Borrell, i cili i kërkoi që për veprimet tash e tutje në veri të koordinohet me KFOR-in e EULEX-in.
Kurti ka thënë se operacionet policore nuk janë punë as e tij e as e zyrtarëve evropianë.
Ai ka arsyetuar se ka operacione kur nuk është i informuar as ai.
“Jemi republikë demokratike. As unë nuk e di kur arrestohet një kriminel, sepse kjo është çështje e policisë hetuese, njësisë që bën arrestimet, prokurorisë. Ka arrestime që unë i shoh saktësisht në të njëjtën kohë si ju, sepse jemi republikë demokratike. I tillë ka qenë arrestimi i Llunës. Mirëpo, veprimet operacionale, kur duhet të arrestohet dikush nuk janë punë e imja, besoj e asnjë zyrtari evropian. Sundimi ligjit në Kosovë është çështje e PK-së. PK-ja ka kryer panumër trajnime në vendet perëndimore, dhe atje kanë mësuar si nuk duhet lejuar të politizohen operacionet policore. Prandaj, nuk mund të bëj çfarëdo pazaresh në kurriz të kushtetutshmërisë dhe ligjshmërisë”, ka thënë Kurti.
Kurti e ka quajtur të pakuptueshme që të paralajmërohen mekanizmat ndërkombëtarë para vendosjes së rendit dhe ligjit në Kosovë.
“Nuk ka kuptim që për zbatim të sundimit të ligjit të ketë koordinim, paralajmërim, para se të ndodhë ligji. Sepse kjo i bie sundim me ligjin, ne jemi për sundim të ligjit”.
Ai u shpreh i gatshëm për takim me palën serbe dhe ndërmjetësit evropianë, por deklaroi se nuk lëshon pe kur bëhet fjalë për zbatimin e ligjit brenda Kosovës.
“Kam shprehur gatishmërinë për dialog. Kur ta caktojnë takimin, jam i gatshëm. Nuk mund të shndërrohem në shkelës i ligjit në Kosovë. Në dialog i gatshëm, i përkushtuar, por në Kosovë ligj dhe Kushtetutë”.
Kurti: Ndërkombëtarët premtuan – nëse bëhet aneksi i zbatimit në Ohër, LS-ja merr pjesë në zgjedhje
Kryeministri Albin Kurti ka thënë se nëse faktori ndërkombëtar u kishte premtuar se nëse bëhet aneksi i zbatimit në Ohër, Lista Serbe do të marrë pjesë në zgjedhje.
Për këtë ka thënë se edhe e patën zgjatur afatin e regjistrimit të partive politike.
“Neve faktori ndërkombëtar na ka premtuar, nëse bëhet aneksi i zbatimit në Ohër, ne ju garantojmë që Lista Serbe merr pjesë në zgjedhje. Unë kam qenë i gatshëm që Lista Serbe të marrë pjesë në zgjedhje përkundër çfarë kanë thënë për mua dhe çfarë i kanë bërë Republikës tonë. A e dini çfarë ndodhë, zgjatet për pesë ditë afati i regjistrimit. Ne e bëmë aneksin e zbatimit në Ohër, dhe Lista Serbe nuk mori pjesë në zgjedhje. Çfarë të bëjmë ne, nuk mund ta marrim Listën Serbe me dhunë të garojë në zgjedhje. Faktori ndërkombëtar premtoi që ata e sigurojnë pjesëmarrjen, për atë e kemi zgjatur afatin”, ka thënë ai.
Ka thënë se është e padrejtë që i gjithë arsenali të zbrazet kundrejt kryetarit të Leposaviqit, Lulzim Hetimi.
LEXO edhe – të gjitha DETAJET në linkun më poshtë:
