Kurti: Brenda këtij viti do të prodhohen municionet e para “Made in Kosova”

Kryeministri në detyrë i Kosovës, Albin Kurti, ka njoftuar se gjatë këtij viti pritet të prodhohen municionet e para me vulën “Made in Kosova”, në fabrikën që po ndërtohet në Jahoc të Gjakovës.Përmes një postimi të publikuar bashkë me një video nga vizita në vendpunishte, Kurti tha se fabrikën e vizitoi së bashku me ministrin e Mbrojtjes, Ejup Maqedonci.“Bashkë me ministrin Maqedonci në Jahoc të Gjakovës vizituam punishten ku po ndërtojmë fabrikën nga e cila këtë vit do të kemi municionet e para me vulën: ‘Made in Kosova.’” –  ka shkruar Kurti.Sipas tij, projekti përfshin “19 hektarë për industri ushtarake në kuadër të 140 hektarëve si zonë industriale e mbrojtjes me perimetër 6 kilometra”.Kurti ka bërë të ditur se zona ndodhet 500 metra vijë ajrore larg aeroportit ushtarak të Gjakovës dhe 19 kilometra larg poligonit në Babaj të Bokës.Ai ka thënë se në fazën e parë të projektit do të prodhohen municione të kalibrave 5.56 mm dhe 7.62 mm.“Në hapin e parë historik për vënien e themeleve të industrisë sonë të mbrojtjes do të prodhojmë fishekë të kalibrave 5.56mm dhe 7.62mm, për të vazhduar deri te dronët ‘Made in Kosova.’” – ka deklaruar Kurti.Kryeministri në detyrë tha gjithashtu se gjatë mandatit të kaluar është rritur buxheti dhe kapacitetet për ushtrinë e Kosovës.“Mandatin e kaluar kemi shumëfishuar buxhetin dhe blerjet sikurse kemi rritur kapacitetet njerëzore” – ka shkruar ai.Sipas Kurtit, për ushtrinë e Kosovës gjatë katër viteve të ardhshme do të ndahen mbi 1 miliard euro.“Për ushtrinë tonë, gjatë katër viteve të ardhshme do të ndajmë mbi 1 miliard euro, duke siguruar fuqizim, pajisje moderne dhe trajnime të avancuara për forcën tonë të armatosur.” – ka deklaruar Kurti.