Pakënaqësitë me zgjatjen e grevës së organizuar nga SBAShK-ut vetëm sa po rriten. Deri sa një pjesë e shkollave pas votimeve të fshehta kanë vendosur të nisin procesin mësimor, në ato shkolla ku ende po mbahet greva, prindërit po organizojnë protesta, raporton KosovaNews.
E sot kundër grevës do të protestojnë edhe prindërit e fëmijëve nga shkolla “Naim Frashëri”.
“Këshilli i Prindërve të Shkollës Fillore të Mesme të Ulët “Naim Frashëri”, Prishtinë, ka organizuar një protestë për të shprehur shqetësimet lidhur me prolongimin e fillimit të mësimit për vitin akademik 2022/2023. Protesta do të me 27 shtator 2022, para SH.F.M.U. “Naim Frashëri” në Prishtinë, duke filluar nga ora 12:10 deri në 13:00”, thuhet në një njoftim nga Këshilli i Prindërve të kësaj shkolle.
Kujtojmë se dje prostetë të tillë kundër grevës kanë organizuar edhe prindërit e fëmijëve nga shkolla “Faik Konica”, në Prishtinë.
Në oborrin e shkollës dje u mblodhën prindër të shumtë që kundërshtuan vazhdimin e grevës së nisur më 25 gusht.
Bashkë me prindërit në protestë kanë dalë edhe shumë nxënës. Ata po mbanin pankarta me mbishkrimet: “Nxënësit nuk janë vlerë monetare”, duke aluduar kështu në kërkesat e SBAShK-ut për shtesa 100 euro.
Ndërkaq dje mori vendim dhe sot nis mësimin edhe njëra ndër shkollat më të mëdha në kryeqytet.
Këtë vendim e mori dje Këshilli i Arsimtarëve të shkollës “Hasan Prishtina”, pas një votimi të fshehtë që kanë zhvilluar.
“Ne si shkollë “Hasan Prishtina”, në mbledhjen e mbajtur nga Këshilli i Arsimtarëve, sot me 26 shtator 2022, me kolektivin e shkollës, u vendos që me votim të fshehtë ta ndryshojmë formën e grevës si vijon: Shkolla jonë vendosi që të ndërpritet greva e përgjithshme, dhe t’i kthemi mësimit në shkollë, por me orë të shkurtuara. Ora mësimore do të jetë 30 min, deri në arritjen e një zgjidhje të përgjithshme mes SBASHK-ut dhe Qeverisë”, thuhet në njoftimin e shkollës.
Tutje njoftohet se nxënësit do të ndjekin këtë orar të mësimit:
Ndërrimi i paradites:
07-30 deri 11:20
Ndërrimi i pasdites:
12:00 deri 15:00
