Ad image

Festohet përvjetori i marrëdhënieve shqiptaro–austriake në Horn të Austrisë

Kosova News
Kosova News 16:06 -30/05/2022

Ambasada shqiptare në Vjenë në bashkëpunim dhe me mbështetjen e bashkisë së qytetit Horn, me rastin e 100-vjetorit të njohjes së qeverisë shqiptare të dalë nga Kongresi i Lushnjës organizuan një pasdite kulturore në muzeun e qytetit Horn.

Në këtë aktivitet morën pjesë bashkatdhetarë shqiptarë të organizuar në shoqata patriotike kulturore, si dhe miq e dashamirës austriakë. Nderuan me pjesëmarrjen e tyre përfaqësues të autoriteteve të Landit nga Austria e Poshtme, Landesrat Franz Linsbauer, të Bashkisë së Qytetit Horn, Kryetari i Bashkisë Mag. Gerhard Lentschig, nënkryetari i Bashkisë, Dr. Heinrich Nagl, anëtarët e këshillit, Martin Seidl dhe DI Reinhard Litschauer.

Instrumentistë tradicionalë dhe studentët e shkollës së muzikës luajtën muzikë tradicionale austriake.

Pjesëmarrësit e shumtë në këtë aktivitet ndoqën me interes pjesët e luajtura në violinçel nga Marigona Komani, korin e mrekullueshëm të grave, vallen e fëmijëve dhe admiruan punimet e pikturës nga piktori Haxhi Fejzullahu.

Atmosferën festive e shtoi edhe më shumë çelja e ekspozitës me kostumet kombëtare nga të gjitha trevat shqiptare. Shiriti i përurimit të ekspozitës, kontribut i organizatës “Tradita veshje shqiptare” drejtuar nga Edlira Sulaj, u pre nga Ambasadori Roland Bimo dhe autoritetet e Landit të Austrisë së Poshtme dhe të qytetit Horn.

Në fjalën e tij, ambasadori shqiptar Bimo evokoi marrëdhëniet e shkëlqyera tradicionale e historike midis të dy vendeve e popujve që shkojnë thellë në histori, qysh nga koha e heroit kombëtar Gjergj Kastrioti-Skënderbeu.

“Këto lidhje janë zhvilluar e fuqizuar me mbështetjen e fuqishme të monarkisë Austro-Hungareze për pavarësinë e sovranitetin e Shqipërisë, si dhe mbështetjen që i jep vendit tonë sot Austria në rrugëtimin drejt integrimit Evropian. Nga ana tjetër, shqiptarët janë pjesë e realitetit austriak, të jetës artistike, shkencore, ekonomike e kohët e fundit edhe me angazhime politike. Figura të shquara, si aktori me famë botërore Aleksandër Mosiu, inxhinieri Karl Gega kanë lënë gjurmë të pashlyeshme në shoqërinë austriake. Të shumtë janë bashkëpatriotët tanë që kontribuojnë talentin e tyre në ekonominë austriake.Vitet e fundit përfaqësues të komuniteteve shqiptare po aktivizohen ndjeshëm edhe në çështje të interesave të komunitetit ku jetojnë e punojnë, përmes përfshirjes në politikat lokale, siç është shembulli i Shefqet Balës. Bala, tashmë anëtar I Këshillit të Qytetit prej disa vitesh, ishte edhe ideuesi dhe organizatori kryesor i eventit”, theksoi Bimo.

Për lidhjet e ngushta tradicionale midis shqiptarëve dhe austriakëve referoi inxhinierFatmir Osmani, ndër aktivitstët e shquar të diasporës shqiptare në Austri.

Ambasada shqiptare në Vjenë i shpreh mirënjohjen e thellë autoriteteve të qytetit Horn dhe mikut të çmuar Wolfgang Welser, për organizimin e shkëlqyer dhe drejtimin profesional të aktivitetit.

Ambasadori Roland Bimo falënderoi të gjithë ata që punuan me përkushtim e veçanërisht sponsorin kryesor të Ambasadës shqiptare “Balfin Holding” dhe Albi Caslli drejtues i projektit “Vienna Resident Progame”.

Mirënjohje “Sharri Markt” për prezantimin e kulinarisë shqiptare, si dhe Aki Nuredini, Ristorante Sole për mbështetjen e rëndësishme.

Këtë ceremoni e nderuan me pjesëmarrjen e tyre Lulzim Pllana, Ambasador i Republikës së Kosovës në Austri, si dhe Markus Posset, Konsull Nderi i Shqipërisë për Austrinë e Poshtme, të cilët mbajtën fjalë përshëndetje për të pranishmit.

Vendosja e marrëdhënieve diplomatike midis Republikës së Austrisë dhe Shqipërisë daton më 18 shkurt 1922. /atsh /

Shpërndaje