Kryeprokurori i Prokurorisë Themelore në Ferizaj, Burim Çerkini, ka deklaruar se vrasja e rreshterit të Policisë së Kosovës, Muhamed Lika, është kryer nga dy persona ende të paidentifikuar, të cilët janë larguar nga vendi i ngjarjes menjëherë pas aktit kriminal.
“I njëjti ka qenë duke u kthyer nga puna dhe në momentin e hyrjes në banesë e në shkallët e ndërtesës nga persona të panjohur është qëlluar dhe nga plagët vdekjeprurëse ka ndërruar jetë. Nga provat materiale që i kemi marrë, shihet që aktin e kanë kryer dy persona që për momentin largohen nga vendi i ngjarjes. Policia e Kosovës është duke bërë një punë të jashtëzakonshme në gjetjen dhe kapjen e autorëve të kësaj vrasjeje”, tha ai.
Sipas tij, janë duke marrë të gjitha veprimet hetimore për të zbuluar arsyen dhe motivet për këtë vrasje të rëndë.
“Gjatë natës së kaluar dhe gjatë ditës së sotme janë intervistuar shume persona, dëshmitarë, persona që kanë rastisur në vendin e ngjarjes, që do të na shpijnë në zbardhjen e kësaj çështjeje. Vrasja e pjesëtarit të Policisë është një rast që ka tronditur mbarë opinionin, duke marr parasysh se i njëjti ishte duke u kthyer nga puna e i cili në këtë shërbim ka dhënë një kontribut në mbrojtjen e vlerave qytetare dhe sigurisë së përgjithshme. Kanë rrjedhur informata për arrestimin e personave të ndryshëm. Mund t’ju them se deri me tani nuk kemi persona të arrestuar për këtë çështje penale”, tha Çerkini
Ai tha se autoritetet kanë nisur hetime intensive që nga momenti i vrasjes, me bashkëpunimin e prokurorit Ismet Rrahmani, i cili ka qenë në kontakt të vazhdueshëm me hetuesit.
“Policia e Kosovës, në koordinim me Prokurorinë, po kryen një punë të jashtëzakonshme për të zbuluar autorët dhe motivet e kësaj ngjarjeje tragjike”, tha ai.
Ndryshe pjesëtari i Policisë së Kosovës, Muhamed Lika, mbrëmë më 1 prill ka humbur jetën pas një sulmi në hyrje të shtëpisë së tij në rrugën “Idriz Seferi” në Kaçanik.
