Kryeministrja e Serbisë, Ana Bërnabiq, ka deklaruar se në Kosovë nuk ka ndodhur gjenocid gjatë luftës së viteve 1998-99.
Pyetur në Forumin e Prespës për Dialog për viktimat e luftës në Kosovë, ajo është shprehur se numrat që përmenden vazhdimisht nuk ekzistojnë, sepse, sipas saj, krimet nuk kanë ndodhur.
“Në Kosovë dhe Metohi nuk ka ndodhur gjenocid. Nuk ka asnjë dënim apo rast që lidhet me këtë gjë. Territori i Kosovës dhe Metohisë deri sot është një prej territoreve post konflikti me më së paku persona të kthyer nga gjithë zonat e pasluftës në botë. Në vitin 2004 kishte një masakër. U rrënuan kisha e manastire, u vranë 8 serbë dhe janë dëbuar thuajse gjithë serbët nga territori i jugut të Ibrit, është bërë pastrim etnik i qyteteve. Prishtina, Gjilani, Gjakova dhe të tjerë”, tha Bërnabiq.
Pak javë më parë, presidenti serb, Aleksandër Vuçiq, bëri betimin për mandatin e tij të dytë presidencial, ku theksoi se do ta mbronte Kosovën, që e cilësoi si “pjesë të territorit të Serbisë”. /euronews.al/
