Në këtë kohë pasigurie për globin krerët botërorë nga nesër për tri ditë radhazi takohen në Mynih të Gjermanisë.
Ata mblidhen në kuadër të Konferencës së sivjetshme të Sigurisë në Mynih, që i fillon punimet të premten, më 17 shkurt, ditën e shpalljes së pavarësisë së Kosovës dhe do të jetë e hapur deri me datën 19 shkurt.
Konferenca është platformë për këmbimin e mendimeve mes krerëve të vendeve të ndryshme të botës, për çështje aktuale të politikës dhe sigurisë globale.
Burimet e KosovaNews brenda kabinetit qeveritar bëjnë të ditur se në këtë organizim të rëndësishëm ndërkombëtar do të merr pjesë edhe kryeministri i Republikës së Kosovës, Albin Kurti.
Ai do ta përfaqësojë vendin tonë dhe do të shpalosë atje qëndrimet e Kosovës për tematikat që diskutohen.
Konferenca e 59 e Sigurisë në Mynih, kësaj radhe do të jetë nën kryesimin e ish-ambasadorit gjerman pranë OKB-së dhe ish-këshilltarit për politikë të jashtme të Angela Merkelit, Christoph Heusgen.
Heusgen e mori kështu stafetën nga një tjetër njohës i rajonit të Ballkanit, Wolfgang Ischinger.
Këtë vit priten të vijnë në kryeqytetin e Bavarisë në jug të Gjermanisë rreth 40 krerë shtetesh dhe qeverish si edhe rreth 100 ministra dhe zyrtarë të tjerë të lartë nga vende të ndryshme të botës. Por në konferencë ka edhe shumë përfaqësues të parlamenteve, ekspertë, organizata joqeveritare e diplomatë.
Ballkani Perëndimor do të jetë ndër diskutimet e konferencës, por fokusi kryesor pritet të jetë padyshim Ukraina dhe ndihma ushtarake për mbrojtjen e saj nga agresori rus./KosovaNews
