I dërguari i Shteteve të Bashkuara të Amerikës (ShBA) për Ballkanin Perëndimor, Gabriel Escobar ka mbërritur në ambientet e qeverisë për t’u takuar me kryeministrin e Kosovës, Albin Kurti.
Escobar është parë i shoqëruar nga ambasadori amerikan në Kosovë, Jeff Hovenier.
Më herët gjatë 13 marsit, në nisje të vizitës së tij në Kosovë emisari amerikan u takua me presidenten e Kosovës, Vjosa Osmani.
Ai deklaroi se në ditët në vijim në Kosovë “do të takohem me shumë njerëz sepse ka shumë punë që duhet të bëhen”.
Gjatë ditës, ai po ashtu u takua me partitë opozitare në Kosovë.
Çështja e dinarit serb dhe tema të tjera pritet që Escobar t’i diskutojë me Kurtin.
Para nisjes së vizitës në Kosovë, Escobar deklaroi se vendimi i autoriteteve të Kosovës për ndalimin e përdorimit të dinarit serb ishte “katastrofik” dhe “jokompetent”.
Ai tha se ShBA-ja nuk e konteston legjitimitetin e vendimit, por ka probleme me mënyrën e zbatimit dhe ndikimin që rregullorja e BQK-së ka në komunitetin serb.
