Shtesat e rrezikshmërisë për zyrtarët policor do të nisin së zbatuari nga nëntori. Kryeministri, Albin Kurti, në mbledhjen e Qeverisë ka thënë se nga këto shtesa do të përfitojnë afër 8 mijë zyrtarë.
“Shtesa për rrezikshmëri do fillojë së aplikuari nga paga e muajit nëntor, kurse për muajt e deritanishëm nga hyrja në fuqi e ligjit të ri për paga, ajo do të ndahet në mënyrë retroaktive. Me aprovimin e këtij vendimi pritet të përfitojnë afër 8 mijë zyrtarë policor”, ka deklaruar Kurti.
Kurti ka thënë se mbeten të përkushtuar në përmirësimin e kushteve dhe pajisjeve për Policinë e Kosovës, në mënyrë që të ketë ulje të rrezikshmërisë gjatë punës.
Ai ka paralajmëruar se në Kuvend do ta prezantojnë projekt-buxhetin e Ministrisë së Punëve të Brendshme për vitin 2024.
“Dje kishim një takim me zëvendësdrejtorin e përgjithshëm të Policisë së Kosovë dhe pjesëtarë të njësisë speciale intervenuese, me të cilët diskutuam gjatë për kërkesat e tyre. I njoftuam dhe siguruam ata se kategorizimi dhe vlera e shtesave është bërë me kujdes të veçantë duke marrë parasysh të gjithë faktorët rreth punës dhe rrezikshmërisë së tyre, por në të njëjtën kohë duke pasur parasysh edhe kufizimet të cilat ekzistojnë”, ka thënë Kurti.
Ndërsa, ministri i Financave, Hekuran Murati, ka thënë se me ligjin aktual të buxhetit është mundësuar që Ministria e Financave të lëviz kufijtë buxhetor.
“Shtesat e merituara janë në nivel prej 7,6 milionë euro, të cilat i kalojnë kufijtë e paraparë për ligjin për sektorin publik”, ka deklaruar Murati.
Qeveria në mbledhjen e sotme ka miratuar Projektligjin për ndryshmin dhe plotësimin e ligjeve që përmbajnë procedura të veçanta administrative dhe harmonizimin e tyre me Ligjin për procedurën e përgjithshme administrative.
Është votuar propozim vendimi përfundimtar, i cili mundëson shpronësimin e pronës së paluajtshme ish shoqërore P. Shy IGK Ballkan” Njësia Damper, (ish Kampi “Casablanka”), për nevoja të Ministrisë së Mbrojtjes dhe Forcës së Sigurisë së Kosovës.
Vendim tjetër ka qenë votimi i Filloretë Gashi – Sadiku si kryesuese e bordit të drejtorëve të Kompanisë Rajonale të Ujësjellësit “Hidromorava” në Gjilan. Kryesuesi i deritanishëm, Habil Zeqiri tashmë do të marrë pozitën e anëtarit të këtij bordi.
Mbledhja ka vazhduar e mbyllur në pikën e pestë, e që ka qenë shqyrtimi i propozim vendimit për ndryshimin dhe plotësimin për programin vjetor për 2023 për rezervat shtetërore të mallrave.
“Kemi ndërmarrë një sërë reformash, politikat tona janë reflektuar përmes ndryshimit të ligjeve duke siguruar standard të caktuar minimal për avancimin e politikave. Kemi siguruar edhe buxhet shtesë, dukshëm më të lartë krahasuar me planifikimin e varfër të qeverive paraprake për buxhetin e rezervave shtetërore”, ka thënë Kurti.
