Kosova do të jetë shtet nikoqir i Lojërave Mesdhetare më 2030.
Vendimi është marrë nga Asambleja e Përgjithshme e Komitetit Ndërkombëtar të Lojërave Mesdhetare (ICMG) në një takim të mbajtur në Heraklion të Greqisë.
Në ditën e fitores së Kosovës poër këtë organizim kryeministri Albin Kurti e ka konsideruar lajmin si “arritje të jashtëzakonshme”, ndërsa sot ka shpërndarë një VIDEO, ku shkruan se nga Heraklioni i Greqisë për në Prishtinë po kthehemi me kujtime të mira, përgjegjësi të reja, e plane të shumta investive.
“Lojërat Mesdhetare 2030 po i sjellim në Kosovë. 7 vjet përgatitje dhe mbi 250 milionë euro investime publike, për t’u bërë nikoqir i 26 shteteve pjesëmarrëse e 23 disiplinave sportive, mijëra atletëve e dhjetëra mijëra turistëve, në ngjarjen më të madhe të sportit në historinë e vendit. Na priftë e mbara!”, ka shkruar Kurti.
Lojërat Mesdhetare organizohen çdo katër vjet dhe për vendet e pellgut të Mesdheut përbëjnë ngjarjen më të rëndësishme shumësportive, pas Lojërave Olimpike.
Në kuadër të këtij organizimi mbahen gara në më shumë se 25 disiplina.
Në to marrin pjesë atletë nga vendet e Afrikës, Azisë dhe Evropës me qasje në rajonin e Mesdheut.
Vitin e kaluar nikoqir i këtij organizimi ka qenë Orani i Algjerisë.
