Kryeministri i Kosovës, Albin Kurti dhe ministrja e Punëve të Jashtme dhe Diasporës, Donika Gërvalla, kanë marrë pjesë në takimin e parë të Grupit Koordinues për anëtarësimin e Republikës së Kosovës në Këshillin e Evropës.
Kryeministri, Albin Kurti, ka thënë se shteti ynë mishëron vlerat e njëjta me Këshillin e Evropës.
“Natyrshëm e kemi vendin në këtë organizatë. Kjo forcon edhe më shumë mbrojtjen e të drejtave të qytetarëve tanë, pa dallim. Kosova ka plotësuar kërkesat ligjore dhe standardet demokratike për pranim në KE”, tha kryeministri Kurti.
Ndërsa, ministrja Donika Gërvalla tha se tash që procesi ka kaluar te asambleja e Këshillit të Evropës, fillon një etapë e rëndësishme e vlerësimit dhe hapave konkret në këtë proces.
“Qeveria e Kosovës do të bashkëpunoj ngushtë në procesin e vlerësimit të grupit punues të Këshillit të Evropës, në çdo etapë. Kur ka kaluar faza e parë gjithçka do të varët nga koordinimi i këtij grupi, nga bashkërendimi juaj varët edhe anëtarësimi i shpejtë i Kosovës në Këshillin e Evropës”, tha ministrja Gërvalla.
Kujtojmë se Kosova ka aplikuar për anëtarësim në Këshillin e Evropës më 12 maj 2022.
Kurse në prill, Komiteti Ministror i Këshillit të Evropës, kishte marrë vendim që t’ia përcjellë Asamblesë Parlamentare të Këshillit të Evropës kërkesën për anëtarësimin e Kosovës.
Ky Komitetit përfaqëson 46 shtetet anëtare të KE-së, ndërsa në një mbledhje të jashtëzakonshme kishte marrë vendimin për Kosovën me më shumë se 2/3 e votave.
Këshilli i Evropës, organizata më e vjetër evropiane për të drejtat e njeriut, demokracinë dhe sundimin e ligjit në Evropë, me seli në Strasburg të Francës.
Është themeluar më 1949.
Këshilli mbron lirinë e shprehjes dhe të mediave, barazinë dhe minoritetet në vendet anëtare.
Këshilli i Evropës u ndihmon vendeve anëtare që të luftojnë korrupsionin dhe terrorizmin, si dhe që të kryejnë reformat e duhura gjyqësore.
