Sot kanë filluar punimet për ndërtimin e rrugës Prizren-Tetovë projekt ky i premtuar nga qeveria Kurti qysh në fillim të mandatit të saj.
Në fillimin e punimeve në llotin 1 dhe 3 ka marrë pjesë edhe kryeministri i Kosovës Albin Kurti bashkë me ministrin e Ministri i Mjedisit, Planifikimit Hapësinor dhe Infrastrukturës Liburn Aliu dhe zëvendësit e tij Hysen Durmishi dhe Jeton Raka, si dhe deputetë të zonës nga lëvizja Vetëvendosje.
Punimet filluan në segmentin Struzhë – Kyçja në autoudhën “Ibrahim Rugova” në Prizren.
MMPHI ka tenderuar ndërtimin e kësaj rrugë në muajin prill të këtij viti në tri lote, por për shkak të ankesave ky proces ka shkuar në OSHP. Në fillim të këtij muaji Organi Shqyrtues i Prokurimit ka rekomanduar nënshkrimin e kontratave për LOT 1 dhe LOT 3, kurse LOT-in 2 e ka kthyer në rivlerësim.
Vlera totale e projektit është paraparë të jetë 35 milionë euro, me gjatësi prej 20.3 km.
Tani po fillon puna në LOT 1, i cili është në vlerë 7,999,999.00 euro, me gjatësi 6.9 km, dhe LOT 3, vlera e së cilit është 8,346,804.38 euro, me gjatësi 6.9 km.
Sipas planit dinamik për të dyja lotet është paraparë që punimet të kryhen brenda 255 ditë pune.
