Kryeministri Albin Kurti në seancën e sotme në Kuvendin e Kosovës ku po shqyrtohet projekt-buxheti foli edhe për kritikat e opozitës për largimin e qytetarëve nga Kosova.
Kurti tha se ka emigrim, por s’ka zbrazje të Kosovës dhe nuk do te ketë as pas 1 janarit.
Sipas tij, gjendja s’mund të ndryshojë sepse ata që hynë në shtetet e BE-së duhet të kthehen.
“Unë s’mendoj që po zbrazet Kosova, ka emigrim, por nuk ka zbrazje të Kosovës dhe nuk do të ketë as pas 1 janarit. E dini që ata që do të shkojnë tani pa nevojë për vizë në zonën Schengen duhet të kthehen. Ata nuk shkojnë sikur në të 90-tat kur kemi qenë të okupuar për azil politik ose azil ekonomik”.
Ai tha se shkuarja e qytetarëve në vendet evropiane e ndihmon komunitetin e biznesit dhe studentët.
Më tej, kryeministri Kurti shtoi se si zotim kryesor si qeveri e kanë pasur punësimin dhe drejtësinë.
“Për më pak se 3 vjet ka më shumë se 16% rritje të punësimit. Sa i përket drejtësisë është e vërtetë që aty kemi edhe më tutje pengesa ndonëse sundimi i ligjit e sidomos luftimi i krimit e korrupsionit është vërtetuar edhe nga organizata prestigjioze që Kosova qëndron më së miri në Ballkanin Perëndimor”, tha Kurti.
