Kryetari i Kuvendit të Kosovës, Glauk Konjufca po qëndron për një vizitë zyrtare në Gjermani, ku edhe ka nisur takimet e shumta me drejtues të shtetit gjerman.
Kryekuvendari Konjufca po sot është mirëpritur në takim nga Presidentja e Bundestagut Gjerman, Bärbel Bas.
“Në frymën e raporteve të ngushta mes vendeve tona aleate dhe mike, diskutuam për çështje të rëndësishme, me orientim në kahjen që partneritetin tonë të ngushtë e të palëkundur nëpër vite ta thellojmë edhe më tej në drejtim të zhvillimit të interesave dhe synimeve tona të përbashkëta”, tha Konjufca.
Ai bëri të ditur se e ka falënderuar homologen e tij për mikpritjen dhe për mbështetjen që Gjermania i ka dhënë gjithnjë Republikës së Kosovës që nga themelimi i saj, por edhe më herët se kaq.
“Në veçanti, shpreha mirënjohjen time dhe të vendit tonë për qëndrimet e qarta të Gjermanisë, sa i përket sulmit terrorist në Banjskë. Nga zj. Bas mora konfirmimin se mbështetja diplomatike, partneriteti dhe bashkëpunimi i gjithanshëm mes nesh do të vazhdojë edhe më tutje”, tha kreu i Kuvendit.
Konjufca tutje tha se e ka njoftuar presidenten e Bundestagut se Kosova ka arritur suksese të rëndësishme sa i përket treguesve të demokracisë në vend, megjithatë shprehu nevojën për shkëmbimin e mëtejshëm të përvojave parlamentare dhe ekstraparlamentare sa i përket rritjes së kapaciteteve demokratike.
