Pas takimit të parë ballë për ballë pas tre vitesh ndërmjet delegacioneve të Rusisë dhe Ukrainës në Stamboll, Kremlini ka dhënë një deklaratë në lidhje me mundësinë e një takimi ndërmjet presidentit rus Vladimir Putin dhe atij ukrainas Volodimir Zelenski, përcjell KosovaNews.
Zëdhënësi i Kremlinit, Dmitry Peskov, deklaroi se një takim mes dy liderëve mund të ndodhë vetëm në rast se arrihet një marrëveshje përmes negociatave ndërmjet delegacioneve përkatëse.
“Një takim i tillë do të ishte i mundur vetëm nëse palët arrijnë një marrëveshje konkrete. Ne e shohim këtë si të mundshme”, tha Peskov.
Ai theksoi se, përpara çdo takimi të mundshëm, duhet të përmbushen marrëveshjet e arritura më herët në Stamboll, përfshirë edhe shkëmbimin e 1000 të të burgosurve të luftës nga të dyja palët.
Lexo po ashtu:
Peskov shtoi se mund të planifikohen edhe raunde të reja negociatash, por kushti paraprak mbetet zbatimi i plotë i pikave të dakorduara në Stamboll.
Ndërkohë, presidenti ukrainas Volodimir Zelenski ka ftuar publikisht Putinin që t’i bashkohet bisedimeve në Turqi. “Do ta pres Putinin në Turqi,” deklaroi Zelenski, duke shtuar se “nëse ai nuk do të kishte frikë të vinte, do të kishim një mundësi reale për të ndërmarrë hapa të rëndësishëm drejt përfundimit të luftës.”
Gjatë një takimi me presidentin turk Recep Tayyip Erdoğan në Ankara, Zelenski u shpreh i gatshëm të udhëtojë në Stamboll për t’u takuar me Putinin, nëse ky i fundit pranon ftesën.
Kujtojmë se ish-presidenti amerikan Donald Trump kishte deklaruar më herët se “asgjë nuk do të ndodhë në Ukrainë për sa kohë që unë dhe Putin nuk takohemi.”/KosovaNews/
