Prishtinë do të jetë vendtakim i qeverive të të dy shteteve, Kosovës dhe Shqipërisë. Një gjë e tillë është konfirmuar nga zyrtarë të qeverisë së Kosovës.
Përveç kësaj, tashmë është vendosur edhe dita se kur kjo mbledhje e përbashkët do të mbahet.
“Mbledhja e përbashkët e dy qeverive, do të mbahet me 20 qershor në Prishtinë”, deklaroi Përparim Kryeziu, zëdhënës i Qeverisë së Kosovës.
Mbajtjen e një mbledhje të tillë të përbashkët, e ka paralajmëruar kohë më parë edhe kryeministri i Kosovës, Albin Kurti.
Mbledhja e fundit e përbashkët e qeverisë së Kosovës e Shqipërisë është mbajtur në fund të nëntorit të vitit të kaluar në Elbasan.
Në atë mbledhje ishin nënshkruar 13 marrëveshje. Ato ishin për zbatimin e lehtësirave të ndërsjella në procedurat doganore dhe/ose të kontrollit të hyrje/daljes së mallrave e për protokoll bashkëpunimi ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për krijimin e Sekretariatit Koordinues Ndërqeveritar.
Marrëveshje tjera ishin për lehtësimin e procedurave dhe kushteve për marrjen e leje qëndrimit të përkohshëm, rregullat e regjimit të trafikut lokal të kufirit, hapjen e pikës së përbashkët të kalimit kufitar Shishtavec (Kukës)–Krushevë (Dragash), ndihmë të ndërsjellë juridike në çështjet civile dhe tregtare, sigurime shoqërore, kalendarin e përbashkët Kulturor Vjetor, bashkëpunim në fushën e trashëgimisë kulturore dhe muzeve, memorandum për ndërtimin e lidhjes hekurudhore Durrës-Prishtinë, bashkëpunim në fushën e arsimit dhe në atë të bujqësisë./rtk/
