Kosova për herë të parë do të jetë nikoqire e “Kongresit Botëror për Persona me Aftësi të Kufizuara”, që do të mbahet sot e nesër në Prishtinë. Temë e edicionit të parë të këtij kongresi është “Bashkë për gjithëpërfshirje dhe prosperitet”, që ka për qëllim bashkimin e personave me nevoja të veçanta nga të gjitha vendet e botës.
Në Prishtinë, sot fillon “Kongresi Botëror për Persona me Aftësi të Kufizuara”, i cili organizohet nën patronazhin e ambasadores së Vullnetit të Mirë për Kosovën, Elvana Shala.
Ajo tha se ky projekt vjen si vazhdimësi e projekteve që ajo sjell çdo vit për kategoritë e margjinalizuara, derisa theksoi se temë e këtij kongresi është “Bashkë për gjithëpërfshirje dhe prosperitet”.
“Kongresi Botëror për Persona me Aftësi të Kufizuara është një ngjarje dyditore që ka për qëllim bashkimin e personave me nevoja të veçanta, organizatave relevante dhe akterëve institucionalë nga mbarë bota për të ndarë dhe shkëmbyer përvojat nga shtetet e tyre përkatëse, me shtetin e Kosovës”, thotë për Radio Kosovën, Shala.
“Marrë parasysh se Kosova është një vend i ri dhe ende në shtet-ndërtim, shkëmbimi i praktikave ligjore, infrastrukturore, sociale me vendet më të zhvilluara në botë do t’i ndihmonte personat me nevoja të veçanta që jetojnë në Kosovë të kenë një jetë me dinjitet, të drejta më të barabarta, dhe integrim të plotë në shoqëri”, thotë ajo.
Shala, bëri të ditur se në kongres do të marrin pjesë rreth 200 përfaqësues ndërkombëtarë e vendorë të organizatave të ndryshme, e diplomatë, presidentja e vendit, Vjosa Osmani, e kryetari i Kuvendit, Glauk Konjufca. Gjithashtu, do të ketë një adresim me video lidhje edhe raportuesja e Parlamentit Evropian për Kosovën, Viola Von Cramon.
“Kemi dy adresime gjatë ceremonisë së hapjes së Kongresit, ku me një fjalë rasti do të drejtohet edhe lartmadhëria e tij mbretërore e Ajmanit nga Emiratet e Bashkuara Arabe, djali i ish-Sekretarit të Përgjithshëm të OKB-së, Kofi Annan, Kojo Annan, i cili drejton fondacionin humanitar “Annan”, në Afrikë, si dhe Viola Von Cramon, raportuesja e parlamentit Evropian për Kosovën”, shpjegon Shala.
Ky projekt është mbështetur nga Zyra e Presidentes së Kosovës, Kuvendi i Kosovës, Komuna e Prishtinës dhe nga ambasadat që veprojnë në Kosovë. Viti 2022, është shpallur nga Qeveria e Kosovës Vit i Personave me Nevoja të Veçanta.
