Republika e Kosovës është bërë shteti i parë nga Ballkani dhe i shtati në botë që i pranohen angazhimet dhe kërkesat në kuadër të Kartës Globale për Reformën e Kujdesit për Fëmijët.
Lajmi është bërë i ditur nga Ministria për Punë, Familje dhe Vlerat e Luftës Çlirimtare, e cila njoftoi se pesë angazhimet kombëtare për periudhën 2026–2028, të ndërtuara mbi legjislacionin ekzistues për mbrojtjen e familjes dhe fëmijëve, janë pranuar në tërësi nga Qeveria e Mbretërisë së Bashkuar.
Sipas ministrisë, prioritetet kryesore që do të fuqizohen në këtë proces janë:
Parandalimi i ndarjes së fëmijëve nga familja
Ofrimi i shërbimeve të integruara familjare dhe komunitare
Zgjerimi i kujdesit familjar alternativ
Digjitalizimi i sistemit të të dhënave
Forcimi i kapaciteteve profesionale
Nga institucionet është vlerësuar se ky zhvillim paraqet një hap të rëndësishëm drejt ndërtimit të një sistemi më të avancuar të mbrojtjes sociale, duke u mbështetur në praktikat më të mira ndërkombëtare për ruajtjen e unitetit familjar dhe mirëqenien e fëmijëve.
Po ashtu, është theksuar se pranimi i këtyre angazhimeve vjen edhe si rezultat i bashkëpunimit dhe përkrahjes nga UNICEF në Kosovë.
Ky vendim konsiderohet si një momentum i rëndësishëm në forcimin e politikave dhe mekanizmave institucionalë në mbrojtje të fëmijëve dhe familjeve në Kosovë.
