Një sasi prej 34 mijë e 420 cigare elektronike është ndaluar në Portin e Durrësit, pasi ishin pa bandorola.
Kjo sasi me cigare prej 1500 kilogramë ishte nisur nga Gioia Tauro në Itali dhe kishte si destinacion Kosovën.
“Në Portin e Durrësit me Anijen MCS Caledonia II, nisur nga Gioia Tauro, Itali ka mbërritur një kontenier i ngarkuar me cigare elektronike në sasinë prej 1500 kilogramë ose 34 mijë e 420 copë. Nga kontrolli i ushtruar nga autoritetet doganore shqiptare ka rezultuar se cigaret elektronike ishin pa pullë fiskale të Republikës së Shqipërisë apo të Republikës së Kosovës. Për këtë arsye, administrata doganore ka pezulluar procedurat e tranzitit, është bërë bllokimi i kontenierit në sheshin e kontenierëve në Portin e Durrësit dhe është kryer referimi pranë Prokurorisë Gjykatës së Shkallës së Parë të Juridiksionit të Përgjithshëm, Durrës, për veprën penale ‘Kontrabanda me mallra që paguhet akcizë’ parashikuar nga nenet 172 të Kodit Penal”, thuhet në njoftim e autoriteteve shqiptare./A2CNN
