Në ditën kur patrullimet dhe kontrollet e Policisë së Kosovës kanë qenë më të shpeshta në veri të vendit me rastin e votimit për shkarkimin ose jo të kryetarëve të komunave, Policia zbuloi diçka të pazakontë.
Njëra nga shtëpitë në Zveçan rezultoi të ishte e mbushur me municion.
Por, sipas Policisë së Kosovës, aksioni nuk kishte të bëjë me ngjarjen kryesore të ditës.
“Pa marrë parasysh të gjitha proceseve që mund të ndodhin në veri të vendit, ne kemi punët tona rutinore. Kemi pranuar informatën që në një shtëpi të braktisur e cila për momentin është e pabanuar, mund të ketë armë. Policia ka reagu, ka shku aty dhe ka gjet dy kallashnikov, disa fishekë, karikatorë edhe diçka tjetër por me siguri është posedim ilegal i armëve. Nuk ka lidhje absolutisht me votimet,” ka thënë Veton Elshani, zëvendësdrejtor i Policisë së Kosovës në veri.
Në shtëpinë e braktisur u gjet edhe një elektroshok për të cilin, policia tanimë i ka dyshimet e saj se kujt i përkasin.
“E kemi një të dyshuar sepse shtëpia është e tij por për shkak se ai nuk është aty, nuk do donim të diskutonim për identitetin e tij,” shtoi Elshani.
I dyshuari, pronë e të cilit është shtëpia, dyshohet se jeton në Serbi.
Ndonëse u tha se kapacitetet me të cilat Policia e Kosovës ka funksionuar gjatë ditës së sotme me rastin e votimit për largimin ose jo të kryetarëve të komunave në veri të vendit, janë minimale, patrullimet e policisë në veri kanë qenë më të shpeshta se zakonisht.
E njëjta vlen edhe për njësitë e karabinierit italian.
