Konferenca e 61-të e Sigurisë në Mynih (MSC) do të mbahet nga sot deri më 16 shkurt 2025, në Mynih të Gjermanisë.
Presidentja Vjosa Osmani është duke qëndruar në Mynih të Gjermanisë.Ajo do marrë pjesë në Konferencën e Sigurisë në (MSC), një nga forumet më prestigjioze globale për çështjet e sigurisë dhe politikës së jashtme.
Po ashtu edhe kryeministri në detyrë i Republikës së Kosovës, Albin Kurti, ka udhëtuar dje për në Mynih të Gjermanisë për të marrë pjesë në konferencën tre ditore të sigurisë – Munich Security Conference 2025.
MSC 2025 do të ofrojë sërish një platformë të pashembullt për debate të nivelit të lartë mbi sfidat kryesore të politikës së jashtme dhe sigurisë në kohën tonë.
MSC 2025 vjen në një moment kyç ndryshimi: një administratë e re amerikane që ka marrë detyrën në janar, një cikël i ri legjislativ evropian nis në Bruksel, dhe zgjedhjet parlamentare gjermane mbahen vetëm një javë pas konferencës.
Pas hapjes nga Presidenti Federal Frank-Walter Steinmeier më 14 shkurt, qindra vendimmarrës dhe liderë të opinionit nga rajone të ndryshme të botës do të diskutojnë sfidat e politikës së sigurisë globale nën kryesimin e Christoph Heusgen.
Të premten, programi kryesor i konferencës do të fillojë me një fokus në sfidat e sigurisë globale, duke përfshirë qeverisjen globale, rezistencën demokratike, sigurinë klimatike dhe shumë tema të tjera, raporton RTKLive. Të shtunën, debatet do të trajtojnë gjendjen e rendit ndërkombëtar, si dhe konfliktet dhe krizat rajonale.
E ardhmja e partneritetit transatlantik do të jetë gjithashtu në fokusin e ditës së dytë të konferencës. Të dielën, konferenca do të përmbyllet me diskutime mbi rolin e Evropës në botë.
MSC 2025 do të shërbejë sërish si një treg idesh dhe do të krijojë hapësirë për sa më shumë debate të rëndësishme dhe me ndikim.
Ashtu si në vitet e mëparshme, programi i konferencës përbëhet nga tre pjesë: programi kryesor i kuruar nga MSC, rreth 200 ngjarje anësore zyrtare dhe dhjetëra aktivitete publike.
Në fund të ditës së tretë dhe të fundit të konferencës, Jens Stoltenberg do të pasojë Christoph Heusgen si Kryetar i ri i MSC.
