Njëra nga problemet më të mëdha të kryeqytetit është komunikacioni i ngarkuar dhe mungesa e parkingjeve. E për ta evituar sadopak këtë problem, Komuna e Prishtinës në vitin 2019 ka nënshkruar kontratën për ndërtimin e parkingut nëntokësor afër Fakultetit të Filologjisë, por që ende nuk e ka përfunduar, pavarësisht se ka kaluar afatin e përfundimit.
Dinamika për ndërtimin e parkingut nëntokësor afër Fakultetit të Filologjisë, po ec tepër ngadalë. Këtë e pranon edhe drejtori i Shërbimeve Publike, Ilirik Musliu. Ai tha për Radio Kosovën se projektin e parkingut nëntokësor e kanë të trashëguar nga qeverisja e kaluar dhe se e kanë gjetur jo në dinamikën se çfarë është paraparë më kontratë.
“Projektin e parkingut nëntokësor, te Fakulteti Filologjik, e kemi trashëguar. E kemi gjetur si administratë e re. Prej fillimit jemi interesuar për dinamiken e punimeve dhe është e vërtetë që e kemi trashëguar jo në gjendje të mirë, jo në dinamiken çfarë është paraparë me kontratë”, ka thënë Musliu.
Për ndërtimin e parkingut nëntokësor, Komuna e Prishtinës në vitin 2019 kishte nënshkruar kontratën me një konsersium Kosovar-Italian “Parking Center”, e sipas kontratës ishte paraparë që projekti të përfundojë brenda 24 muajve të ardhshëm. Por, Komuna e Prishtinës as tani për tani nuk e di kohën se kur do të përfundojë ndërtimi i këtij parkingu.
“Nuk kemi data se kur do të përfundojë dhe nuk mund të jap ndonjë arsye. Punimet varen prej faktorëve të ndryshëm, nuk është projekt i vogël por gjithsesi jemi duke bërë maksimumin që në një periudhë sa më të shpejtë ta jetësojmë parkingun nëntokësor”, ka shtuar Musliu.
Ndryshe kapaciteti i këtij parkingu do të jetë 500 deri 900 makina.
