Komuna e Prishtinës ka reaguar në lidhje me vdekjen e një personi që kishte rënë në një pusetë të hapur në Prishtinë më 9 gusht duke thënë se rasti ka ndodhur në rrugë që është kompetencë e qeverisë dhe jo e komunës.
“Dëshirojmë të sqarojmë për publikun se është konstatuar nga ekipet tona dhe konfirmuar nga Policia e Kosovës, se puseta në të cilën ka rënë i ndjeri është në rrugën magjistrale Prishtinë – Podujevë. Kjo rrugë magjistrale nuk është në kompetencë të Kryeqytetit, por në kompetencë të Qeverisë së Republikës së Kosovës dhe pjesë e punimeve të menaxhuara nga Qeveria. “, thuhet në reagimin e komunës së Prishtinës.
Komuna e Prishtinës i ka cilësuar “për keqardhje deklaratat e pavërteta nga përfaqësues të Lëvizjes Vetëvendosje të cilët sipas tyre “këtë fatkeqësi të rëndë tentojnë ta politizojnë dhe përmes shpifjeve tentojnë t’ia hedhin fajin organeve të Kryeqytetit”.
“Janë për keqardhje deklaratat e pavërteta nga përfaqësues të Lëvizjes Vetëvendosje të cilët këtë fatkeqësi të rëndë tentojnë t’a politizojnë dhe përmes shpifjeve tentojnë t’ia hedhin fajin organeve të Kryeqytetit”, thuhet tutje në reagimin e tyre.
Më herët, Policia e Kosovës përmes raportit 24-orësh njoftoi për vdekjen e personit që po trajtohej në QKUK që kur ra në pusetë më 9 gusht dhe i njëjti vdiq më 19 gusht si pasojë e lëndimeve të marra.
“ASGJËSIM, DËMTIM APO HEQJE E PAJISJEVE MBROJTËSE. Prishtinë / 09.08.2024 – 21:30. Më 19.08.2024 në QKUK ka ndërruar jetë viktima mashkull kosovar i cili ishte duke u trajtuar në QKUK si pasojë e lëndimeve të pësuara pasi kishte rënë në një pusetë të hapur më 09.08.2024. Në konsultim me prokurorin është inicuar rasti dhe mbetet në hetime”, thuhej në raportin e PK-së.
